Чурапчы улууһугар соҕотох кырдьаҕастары дьиэ-кэргэҥҥэ иитэ ылыы өрө тутуллар

Саха Республикатын 2013 сыл олунньу 21 күнүнээҕи З№1230-IV “Кырдьаҕастарга приемнай семья тэрийии туһунан” сокуонугар олоҕуран Чурапчы улууһун социальнай харалта тэрилтэтин иһинэн 2013 сылтан күн бүгүн барыта 33 приемнай семья үлэлиир. Итинтэн эр киһитэ 16, дьахтара 17. Ол иьигэр бастакы сыл бииргэ олорооччулар 6 ыал. 1-2 сыл олорор 6 ыал, 2-3 сыл 7 ыал, 3 сылтан үөһээ бииргэ олорор ыал 14. Доруобуйаларынан хааччахтаах 1 группа 1 киһи, 2 группа 1 киһи. 80 сааһыттан үөһээ 5 кырдьаҕас көрүүгэ баар.

Бу сокуон соҕотох кырдьаҕастар, 1,2 группалаах доруобуйаларынан хааччахтаах соҕотох дьону дьиэ кэргэҥҥэ көрө ылыы туһунан. Дьахтар 55 сааһыттан, эр киһи 60 сааһыттан ону таһынан 1,2 группалаах доруобуйаларынан хааччахтаах дьон бу сокуоҥҥа киирсэллэр. Ыйдааҕы төлөбүрэ 2022 сылга 22154 солк. тэҥнэһэр.

Бу сокуон олоххо киириитигэр биһиги кырдьаҕастарбыт дойдуларыттан ырааппакка, дьиэ кэргэҥҥэ олорор кыахтаммыттара. Бастакы “хараҥаччыларбытынан” буолаллар Сидорова Мария Пантелеймоновна, үлэ бэтэрээнэ уонна Барабанская Дария Васильевна. Дария Васильевна киэн сүрэхтээх, аһыныгас дууһалаах киһи Мария Пантелеймоновна иннинэ Сидорова Варвара Романовнаны олус үчүгэйдик көрөн-харайан, кырдьаҕас үйэтин уһаппыта. Билигин Мария Пантелеймоновнаны олус үчүгэйдик көрө-истэ олорор.

Мария Ефимовна, Егор Егорович Поповтар соҕотох киһини Тамирин Юрий Николаевиһы сүүрбэччэ сыл көрдүлэр. Юрий Николаевич Муома улууһуттан эдэр сааһыгар мас кэрдээччинэн кэлэн баран устунан Чурапчыны сөбүлээн Поповтарга хаалан хаалбыт, ол кэннэ 2013 сылтан приемнай семьяҕа договор түһэрсибиттэрэ. Мария Ефимовна олус үчүгэйдик, иһирэхтик көрөн-истэн Юрий Николаевич махтала муҥура суох.

Итинник дьиэ кэргэн буолан биһиги улууска 2013 сылтан, сокуон олоххо киириэҕиттэн барыта 50 ыал үлэлээн кэллэ.

Холобур оностон кэпсээтэххэ, Красильниковтар Владилена Николаевна, Валерий Иннокентьевич “эһээ” оҥостон Петров Афанасий Николаевиһы 2019 сылтан көрөн олороллор. Афанасий Николаевич соҕотох кырдьаҕас киһи ыал олоҕор киирэн олус сылаастык, ыраастык астынан-дуоһуйан олорор, доруобуйата тубуста. Валерий кырдьаҕаһын бултка илдьэ сылдьар, бииргэ убаһаларын көрөллөр, сыһыаннара истиҥ.

Максимов Владимир Семенович икки доруобуйатынан хааччахтаах эдэр дьону көрөн олороро наһаа хайҕаллаах дьыала. Бу эдэр дьон ханна да барар-кэлэр сирдэрэ суох бириэмэлэригэр Владимир Семенович түбэһэ түһэн билигин көхөөхтүк, этэҥҥэ олороллор.

Габышева Анна Егоровна икки кырдьаҕаһы көрөн олороро эмиэ хайҕабыллаах, холобур оностор киһибит. Эдэр киһи киэҥ дууһата, амарах санаата кырдьаҕастарбытыгар үйэлэрин уһатар, санааларын бөҕөргөтөр, өйөбүл буолара олохтон астыныыны аҕалара сүдү суолталаах.

Кытаанах нэһилиэгин олохтооҕо Собакин Петр Иванович икки доруобуйаларынан хааччахтаах дьоммутун көрөн олорор. Дьиэлэрэ-уоттара суох, ыалдар дьон кыһалҕаларын кыһалҕа гынан, утары баран бары биир өйгө-санааҕа кэлэн олохторо тупсан олороллор.

Ити курдук Чурапчы улууһун үрдүнэн элбэх кырдьаҕас бу сокуонунан туһанан олорор олохторо тубуста диэтэхпинэ сыыспаппыт буолуо. Аҥаардас кырдьаҕас, ыалдьар киһи уйан дууһатын таба көрөн ис сүрэхтэн кыһанан көрөр ыалларбытыгар, кырдьаҕастарга кыһамньыларын иһин барҕа махталбытын тиэрдэбит.

Анастасия Васильева,

Чурапчы улууһун социальнай харалта управлениятын

кырдьаҕастары дьиэҕэ көрүү сэбиэдиссэйэ