Байҕал бааллаах, үлэ күүрээннээх

Быйыл 2023 сыл – Арассыыйаҕа Педагог уонна настаабынньык, Саха Республикатыгар – Үлэ,  улууспутугар  – Табаны иитии,  Сааскылаах нэһилиэгэр  – Аҕа, Үрүҥ Хайаҕа – Дьоруой табаһыт Илья Константинович Спиридонов  төрөөбүтэ 110 сылларынан  биллэрилиннилэр. Маны сэргэ 2023 сыл –  Саха сиригэр спорт хамсааһынын 100 сыла бэлиэтэнэр.

    Бастакынан,   ааспыт сыл түмүктэринэн аҕа баһылык  Эдуард Платонов ситиһиилээх үлэлэрин, тус кылааттарын иһин  «РФ үөрэҕин эйгэтин бочуоттаах үлэһитэ» бочуоттаах ааты Үрүҥ Хайа орто оскуолатын начальнай кылааһын учууталыгар Лидия Павловаҕа, Анаабыр улууһун баһылыгын бочуотунай грамотатын полиция подполковнигар Софрон Шоноевка, улуустааҕы саҥа көлүөнэ билиотекатын сэбиэдиссэйигэр Марфа Боярскаяҕа, улуустааҕы кыраайы үөрэтэр этнографическай музей сэбиэдиссэйигэр Джулия Мироноваҕа, СР социальнай фондатын клиентскай сулууспатын вахтерыгар Аксинья Макароваҕа, «Ростелеком» ПАО Анаабырдааҕы филиалын спеиалииһигэр Егор Туприҥҥа туттарда. Салгыы байыаннай дьайыыга сылдьар уолаттарбытыгар уонна кинилэр дьиэ кэргэттэригэр үбүнэн көмөлөрүн иһин Махтал суругу  урбаанньыттарга  Вера Ивановна Николаеваҕа,  Лыткина Ирина Юрьевнаҕа, Андросова Вера Михайловнаҕа, Захаров Яков Николаевичка биэрдэ. 
    Салгыы “Анаабыр улууһун үөрэҕин ситимигэр тус кылааттарын» иһин түөскэ кэтэр бэлиэни Үрүҥ Хайа орто оскуолатын нуучча тылын уонна литературатын учууталыгар Любовь Корякинаҕа, Сааскылаах орто оскуолатын начальнай кылааһын учууталыгар Людмила Тупринаҕа, Анаабыр улуустааҕы гимназиятын музыка уонна технологияҕа учууталыгар Саргылана Тупринаҕа улуус баһылыгын бастакы солбуйааччы Василий Поскачин сибэкки дьөрбөтүн биэрэн туран истиҥник  туттарда. 
Бу кэнниттэн Арассыыйа норуоттарын култууратын нэһилиэстибэтин сылын эстафетатын улуустааҕы культураҕа управлениетын начальнига Надежда Слепцова тахсан Арассыыйаҕа Педагог уонна настаабынньык сылынан үөрэх управлениетын начальнига Туйаара Гуляеваҕа, Москва куораттан кэлбит педагогическай наука кандидата Наталья Муродходжаеваҕа туттарда. Оттон Сахабыт сиригэр Ил Дархан Айсен Николаев Үлэ сылынан биллэрэн, Ийэ сылын эстафетатын элбэх оҕолоох ийэ Софья Ивановна Акакиева улуустааҕы Дьарыктаах буолуу киинин салайааччытыгар Прасковья Тупринаҕа биэрдэ. Дьоро киэһэҕэ 2023 сыл Анаабыр улууһугар Таба иитиитин сыла биллэриллибитинэн сыл логотибын Анаабыр национальнай (долган-эбэҥки) улууһун аҕа баһылыга Эдуард Петрович Платонов  улуустааҕы тыа хаһаайыстыбатын салаатын салайааччытыгар Туйаара Виссарионовна Николаеваҕа туттарда. Онтон Сааскылаах эбэҥки нэһилиэгэр Аҕа сыла биллэриллибитинэн баһылык солбуйааччыта Туяра Туприна сыл бэлиэтин нэһилиэк аҕаларын Сэбиэтин бэрэссэдээтэлигэр Вадим Туприҥҥа биэрдэ. 
    Салгыы Үрүҥ Хайа национальнай дулгаан нэһилиэгэр бастыҥ табаһыт, ССРС-ка Социалистическай Үлэ дьоруойа Илья Константинович Спиридонов 110 сааһын сылынан уонна “Севернай» таба иитэр  сопхуоһа төрүттэммитэ 40 сылынан биллэрилиннилэр. Олохтоох мелодист, айар куттаах Гаврил Спиридонов  бэйэтин матыыбыгар, Светлана Туприна тылларыгар “Ылдьаабыт Дьоруойбут» ырыаны киэн туттан ыллаата. Бу кэнниттэн 2023 сыл СР спортивнай хамсааһына тэриллибитэ 100 сылынан СР үтүөлээх тренера Сергей Петрович Протодьяконов сценаҕа тахсан көрөөччүлэри эҕэрдэлээтэ, улууспутугар спорду сайыннарыахпыт диэн эрэлин биллэрдэ. Мантан салгыы Сааскылаах уонна Үрүҥ Хайа национальнай нэһилиэктэрин кэрэ эйгэтин талааннаахтарын улахан кэнсиэрэ көрөөччүлэр куттарын тутуон тутта. Инники олохпут саргыта салалынна, түөрэҕэ түстэннэ…

 Гуннара Байгильдина