“Газпром” уонна Саха сирин демографията

Билэргит курдук, 2020 с. балаҕан ыйын 21 күнүгэр “Газпром” хампаанньа салайааччыта Алексей Миллер уонна Саха өрөспүүбүлүкэтин баһылыга Айсен Николаев Саха сиригэр 2021-2025 сылларга гаас ситимин тардыыны уонна гааһынан хааччыйыыны мэктиэлиир программаҕа илии баттаан тураллар.

Бу 2016-2025 сыллары хабан үлэлээбит программаны саҥардар, үбүн-харчытын чопчулуур программа буолар.

Ол быһыытынан, “Газпром” 2021-2025 сс. газтааһыҥҥа көрөр үбэ 2016-2020 сылларга угуллубут үптээҕэр 48,6 төгүл улахан буолбута – 9,043 млрд солкуобай!

Бу барыта үүнэр көлүөнэ, оҕо-аймах кэскилигэр туһаайыллыбыт быһыы. Гаас тардылыннаҕына ыаллар дьиэлэрэ, оскуолалар, балыыһалар, оҕо тэрилтэлэрэ дэлэ тупсуохтара дуо! Ыаһах аайы ыстал буолбут үгүс суланыыбыт, холобур, “21-с үйэҕэ таһырдьа сылдьарбыт” туһунан, умнууга хаалыан сөп. Оҕолор абыраналлар.

Ол курдук, “Сибиир күүһэ” хорук турбаттан алта салаа тахсар – холбоон 37 км усталаахтар, гааһы тарҕатар станциялардаахтар. Дьэ, балартан бөһүөлэктэр икки ардыларынааҕы, барыта 186 км усталаах тоҕус тымыр тарҕаныахтаах. Ол түмүгэр Алдан, Ленскэй, Нерюнгри уонна Өлүөхүмэ улуустара, ол иһигэр Алдан, Өлүөхүмэ куораттар, Бэчинчэ, Мууруйа, Иенгра, Чульман курдук нэһилиэнньэлээх пууннар гааһынан хааччыллалар.

Билэргит курдук, “Газпром” – Арассыыйа национальнай хампаанньата. Онон национальнай бырайыактартан туора туруон хайдах да сатаммат. Туох баар 12 национальнай бырайыакка барытыгар кыттар – үөрэхтээһинтэн, доруобуйа харыстабылыттан саҕалаан, биллэн турар, демографияҕа тиийэ.

Санаан көрүҥ, гаас тыа сиригэр тиийиитэ – улахан суолталаах быһыы. Тыа сиригэр дьон олорор усулуобуйата тупсар, оттон билиҥҥи дьалхааннаах күҥҥэ-дьылга (коронавирус, сибээт-сибээт-сибээт!) дьон мантан инньэ тыаҕа тардыһар буолуон сөп. Тыаҕа дьиэлээх-уоттаах дьон онтуларын сөргүтэллэрэ үксээтэ.

Тыа сиригэр оҕо төрөөһүнэ хаһан баҕарар куораттааҕар икки-үс, чэ, баҕар балтараа да төгүл буоллун, үрдүгэ мэлдьэһиллибэт. Тыа дьоно түүннэри-күннэри үлэһиттэр.

Оччотугар тыа сиригэр ыччаты тардар сорук турар. Онуоха биир сүрүн төһүүнэн, биллэн турар, олох-дьаһах тупсуута буолар. Ол “күөх төлөнү” кытта быһаччы ситимнээх.

Аны туран, 2022 сылга, ол эбэтэр Саха өрөспүүбүлүкэтэ төрүттэммитэ 100 сыллаах үбүлүөйүгэр “Газпром – оҕолорго” программа чэрчитинэн Дьокуускайга бассыайыннаах уонна муус катоктаах физкультурнай-чэбдигирдэр киин тутуллан үлэҕэ киириэҕэ. Маннык эрээри бассыайына суох, катоктаах кииннэр Алдан куоратыгар уонна Чульман бөһүөлэгэр тутуллаллар.

Бу иннинэ “Газпром” Дьокуускайга “Стерх” үгүс хайысхалаах спорт киинин, “Арассыыйа – мин историям” история пааркатын туппутун билэбит. Ону таһынан Ленскэй куоракка физкультурнай-чэбдигирдэр киин тутуутугар кырата суохтук кыттыспыттаах.

Онон “Газпром” национальнай хампаанньа “Демография” национальнай бырайыагы олоххо киллэриигэ биир саамай төһүү тэрилтэнэн буолар.

Якутяне.ком