2023 Үлэ сылыгар, үлэ дьонун өйүөххэ

Балаҕаннаах нэһилиэгин эдэр фермера Кардашевскай Петр Владимирович 2016 сыллаахха ТХМ-тин “Саҥа саҕалааччы фермер” куонкуруһугар кыттан, кыайан 1 мөлүйүөн 500 тыһыынча суумалаах гран ылан үлэтин саҕалыырыгар 4 эрэ ынах сүөһүлээх этэ.

Үлэлээбит сылларыгар кини ынах сүөһүтүн 90 тахса төбөҕө тиэрдэн, ТХМ гранын балаһыанньатын 5 сыллаах ирдэбилин эрэллээхтик толордо.
Республика Ил Дархана Айсен Сергеевич Николаев 2023 сылы Үлэ сылынан биллэрдэ.
Петр Владимирович үлэ сылыгар сыал – сорук туруорунан “Сээс” тыа хаһаайыстыбатын өҥөнү оҥорор кооперативын тэрийэн, нолуок тэрилтэтигэр регистрацийатын бигэргэттэ. Кини бүгүн кооператив 100 төбө ынах-сүөһүгэ аналлаах хотон тутуутугар ТХМ-тин куонкуруһугар кыттар санаалаах боппуруостары быһаарса, сүбэлэтэ тыа хаһаайыстыбатын миниистирэ Атласов Александр Павловичка уонна миниистири бастакы солбуйааччы Попов Петр Ивановичка приемҥа киирэ сырытта.

Александр Павлович, Петр Иванович эдэр кооператив салайааччытыгар Петр Владимировичка куонкуруска киирсэр докумуоннары ситэрэн-хоторон бэлэмнииригэр сүбэлээтилэр, үлэтин тиһэҕэр тиэрдэригэр, саҕалаабыт үлэтэ-хамнаһа түмүктээх буоларыгар уонна эдэр дьон тыа хаһаайыстыбатыгар ылсан үлэлииллэрин өйүүллэрин биллэрдилэр.
2022 сыл Балаҕаннаах нэһилиэгин өрүс арыытыгар оттообут отун Бүлүү өрүс уута таһымнаан, илдьэ барбытын үрдүнэн Республика тыа хаһаайыстыбатын министиэристибэтэ көмөлөһөн, атыыласпыт отун 30 % уонна от тиэйэр – ороскуотун толору уйунан, Хатастан от тиэйтэрэн аҕалла, улуус иһиттэн Далыртан, Мэйиктэн от ылан сотору аҕалан кыстыгы этэҥҥэ туоруурга эрэллээх.

Петр Владимирович билиҥҥи туругунан бэйэтин хаһаайыстыбатыгар эбии 4 ыал сүөһүтүн дуогабар быһыытынан ылан көрө олорор.
Кини 100 төбөҕө кооператив хотонун тутарга ТХМ куонкуруһугар кыттар баҕалаах.

Инники өттүгэр сааһыран сүөһүлэрин тохтотуон баҕарар дьоҥҥо көмөлөһөн, кинилэри кооперативка киллэрэн, сүөһүлэрин ылан көрөн, эспэттэригэр көмөлөһөр сыаллаах – соруктаах кооператив тэрийдэ.

Петр Кардашевскай курдук эдэр патриот уолаттар үлэ сылыгар үлэҕэ – хамнаска ылсан эрэллэриттэн, кинилэри тыа сирин дьоно – сэргэтэ, Республика, улуус салалталара өйүөхтэрэ дии саныыбыт.

Дмитриев С.И, Үөһээ Бүлүү Балаҕаннаах нэһилиэгин баһылыга
Олунньу 13 күнэ 2023 сыл