“Саха кэриэйдэрэ” түмсүү силигэ ситтэ, үлэтэ кэҥиир кэскиллэннэ

Бүгүн, ол эбэтэр алтынньы 1 күнүгэр, Дьокуускайга “Саха кэриэйдэрэ” түмсүү тэрийэр бөлөҕүн уочараттаах мунньаҕа буолан ааста. Кэпсэтиигэ түмсүү бэрэссэдээтэлэ М.В. Дьячковскай, Ю Владимир Ш., Очосов Ю.Д., Егорова-Теменхон В.И. кыттыыны ыллылар. Ону таһынан онлайн-кыттыылаахтар бааллар: Алексеев И.Д. (Бүлүү), Габышева М.Н., Пак И.А., Ким Ия.

Бэрэссэдээтэл Дьячковскай М.В. иһитиннэрбитинэн, түмсүү Юстиция министерствотыгар регистрацияны ааспыт, анал бэчээттэммит, онон толору уопсастыбаннай тэрилтэ буолбут. Онон сибээстээн усунуос төлөбүрүн туһунан боппуруос турар. Усунуоһу анал счёкка түһэриллиэхтээх.
Кээмэйдэрэ манныктар: киирии усунуос – 500 солк, ыйдааҕы – 100 солк. Сыллааҕыны биирдэ төлүөххэ сөп: 1200 солк.

Мунньах кыттыылаахтара түмсүү сүрүн соругун чопчуластылар.
Бастатан туран, өбүгэ дьоммут, аҕаларбыт, эһэлэрбит ааттарын тилиннэрии. Онуоха үлэ бара турар. Бүтүн кинигэ таҕыста. Иккис кинигэ бэчээккэ бэлэмнэнэр. Сир-сир аайы өйдөбүнньүктэр турдулар (Дьокуускайга, Хаҥаласка, Сунтаарга, Элгээйигэ). Өссө да туруохтара диэн эрэл баар.
Иккиһинэн, кэриэйдэр Саха сирин историятыгар киллэрбит кылааттара умнуллуо суохтаах. Саха сиригэр сэбиэскэй былаас олохтонуутугар, көмүс промышленноһын сайдыытыгар үтүөлэрэ, Аҕа дойду улуу сэриитин кэмигэр элбэх киһи олоҕун хоргуйууттан быһаабыттара, Саха сиригэр оҕуруот аһын олордуутун киэҥник тэниппиттэрэ, саха омук демографиятыгар оруоллара. Ол барыта саха дьонун өйүгэр-санаатыгар тыыннаах. Ол тыыннаах өй-санаа умнуллубатын ситиһиэх тустаахпыт.

Сунтаар улууһуттан Ю.Д.Очосов илдьэ кэлбит кэпсээнин сэҥээриэҕиҥ.

Ол курдук, 2021 с. от ыйын 2 күнүгэр Сунтаар улууһун уонна Корея Чолла-Намдо провинциятын Тамян уеһын муниципальнай сэбиэтин бэрэстэбиитэллэрэ бииргэ үлэлэһии кэскилин кэпсэппиттэр. Видеоконференцияҕа Сунтаар аатыттан улуус баһылыга Анатолий Васильевич Григорьев, Корея аатыттан Тамян уеһын Муниципальнай сэбиэтин бэрэссэдээтэлэ Ким Чжон О хоруй туппуттар. Кэпсэтиигэ эҕэрдэ тылы тас сибээстэһиигэ уонна СӨ норуоттарын дьыалаларыгар миниистир Гаврил Кириллин эппит.

Кэпсэтии кэскиллээх бырайыактары олоххо киллэрии, култуура хайысхаларынан, тыа хаһаайыстыбатыгар, промышленноска, үөрэхтээһиҥҥэ, спорка, ону кытта урбааҥҥа уонна туризмҥа инновационнай технологиялары туһаныыга кыттыгас үлэ тула барбыт. Өрүттэр бэйэ бэйэлэригэр ыалдьыттаһар туһунан үлэспиттэр.

Автор: Валерия Теменхон