СӨ народнай худуоһунньуга Александр Гоголев – Сатал 75 сааһыгар аналлаах «Күн аптаах ситимэ» диэн айар үлэтин быыстапката турда

Саха Өрөспүүбүлүкэтин народнай худуоһунньуга Александр Гоголев – Сатал 75 сааһыгар аналлаах «Күн аптаах ситимэ» диэн ааттаах быыстапка аһыллынна.  Тэрээһин Арассыыйаҕа Учуутал уонна уһуйааччы, Саха сиригэр Үлэ сылын чэрчитинэн ыытылынна. Быыстапканы «Симэх» норуот ускуустубатын уонна уус-уран оҥоһуктарын национальнай киинэ тэрийдэ. 

Александр Николаевич бу киини 2017 сылтан 2020 сылга диэри салайбыта. Өр кэмҥэ айар уустары, талба талааннаахтары, норуот маастардарын түмэн, киэҥ далааһыннаахтык үлэлээбитэ. 

«Норуот ускуустубатыгар уонна уус-уран оҥоһуктарыгар судаарыстыбаннай өйөбүл» ылыныллыбыт Саха Өрөспүүбүлүкэтин Сокуонугар, «Норуот уус-уран оҥоһуктарыгар көмө уонна өйөбүл» судаарыстыбаннай бырагыраамаҕа элбэх өрүттээх үлэни ыыппыта.

Александр Николаевич айбыт элбэх ахсааннаах хоһоонноро, мас оҥоһуктара, хартыыналара инникитин да дьон сэҥээриитин ылыахтара дии саныыбын. Өссө даҕаны уран тарбаҕа, мындыр өйө, ураты көрүүтэ дьон-сэргэ биһирэбилин ылан, өссө да үрдүк чыпчааллары дабайа турдун!

СӨ култуураҕа уонна духуобунай сайдыыга миниистирэ Афанасий Ноев