Ийэлэр ыҥыраллар…

Боотулуу нэһилиэгин тэрилтэлэрин салайааччылара, дьокутааттар, түөлбэлэр салайааччылара, общественниктар кыттыылаах нэһилиэк дьаһалтатын нэдиэлэ аайы буолар планеркатыгар дьүүллэһэн баран, Боотулуу нэһилиэгин ийэлэрэ Саха сирин дьонугар туһаайан маннык ис хоһоонноох ыҥырыы ылыннылар.

Саха Өрөспүүбүлүкэтин бары ийэлэригэр ыҥырыы!

            Кэлэн иһэр, Саха Өрөспүүбүлүкэтин 100 сыллаах үбүлүөйдээх, 2022 сылын Ил Дархаммыт Ийэ сылынан биллэрбитэ олус тоҕоостоох. Биллэрин курдук, Сахабыт сирин экономиката, социальнай уонна духуобунай олоҕо сайдарыгар ийэлэр суолталара улахана мунаарыыны үөскэппэт. Үүнэр көлүөнэни чөл олохтоох, араас куһаҕан дьаллыктарга умньамматах гына иитии дьиэ кэргэн, чуолаан ийэлэр, уопсастыба иннигэр эппиэтинэспит буоларын бэркэ диэн өйдүүбүт.
            Ааһан эрэр 2021 сылы Ил Дархан Өрөспүүбүлүкэҕэ Доруобуйа сылынан биллэрбитэ. Бу тэрээһин өссө 2030 сылга диэри уһатыллан турар. Маны өйөөн, Үөһээ Бүлүү улууһун Боотулуу нэһилиэгин биир ытыктанар кэллэктиибэ,  балыыһа үлэһиттэрэ табаахтан аккаастанарга, буолар бырааһынньыктары арыгыта суох көрсүү, атаарыы култууратын  пропагандалыырга Саха сирин бары олохтоохторугар 2021 сыл тохсунньу ыйыгар ыҥырыы таһаарбыттара. Ыҥырыы, «Кыым» хаһыакка бэчээттэммитэ эрээри, хамсык дьалхаанын күлүгэр умнууга хаалбыта. Биһиги, Боотулуу нэһилиэгин ийэлэрэ, бу бэйэтин кэмигэр саамай сөптөөх ыҥырыыны өссө төгүл өйөөн, Саха сирин бары олохтоохторун буортулаах дьаллыктартан баҕа өттүбүтүнэн босхолонон, чөл олохтоох саҥа көлүөнэ дьону, саҥа сахалары иитиэҕиҥ диэн ыҥырабыт!
            Туругурдун ааспыт олох буортулаах дьаллыктарыттан босхоломмут Саха омук!
 
Үөһээ Бүлүү улууһун Боотулуу нэһилиэгин ийэлэрэ.
2021.12.27 күнэ.