Үөһээ Бүлүү быыбара: Эрдэлээн өрүллүбүт күөс хаахтыйда…

Суолласта, сурукка тистэ – *СУР.*

*Сир этыы-эргиэн эгэлгэтэ буолуоҕуттан ымсыы, иҥсэ-мэнэгэй дьон сири апчарынар туһугар тугу да кэрэйбэттэрин туһунан истэ-билэ сылдьабыт.*

2020 с. ахсынньы ыйыгар Софронова Валентина диэн Кэнтик олохтооҕо уһаайба сирин арендаҕа ылбыт. Саҥа уһаайбалар быһыллан сытар сирдэрэ баарын Кэнтиккэ сылдьар дьон билэр буолуохтаахтар.

Сокуон ирдэбилинэн, киһи арендаҕа ылбыт сирин бас билиигэ көһөрүөн баҕарар буоллаҕына, онно хапытаалынай эбийиэк туттуохтаах. Акылаакка турар дьиэ, баанньык, гараж уонна да атын тутууну. Онтугар техническэй былаан оҥорторон докумуоннатан, регистрациялыыр палата нөҥүө бэйэтин аатыгар суруйтарыахтаах. Ол докумуонун муниципальнай баайы-дуолу сүрүннүүр кэмитиэккэ (КУМИ) аҕалар, оттон кэмитиэт ону бэрэбиэркэлээн баран, сири бас билиигэ биэрэр.

Валентина Софронова 2023 сыл ахсынньы ыйыгар КУМИга сайыбылыанньа киллэрэр – гараж тутуннум, докумуона бу баар, сири мин бас билиибэр аҕалыҥ диэн.

Кэнтик Үөһээ Бүлүү сэлиэнньэтиттэн субу сытар буоллаҕа, онон кэмитиэт үлэһиттэрэ кэлэ-бара эппиэтинэстээх сирдэригэр харахтарын быраҕа сылдьаллар. Ол диэки гараж тутулла охсубутун атыҥырыы истэннэр, көрөн итэҕэйэргэ быһаарыналлар.

Тиийбиттэрэ – гараж мэлиһээй! Уһаайба сыа хаарынан көрөн турар. Биллэн турар, үлэһиттэр барытын хаартыскаҕа түһэрэллэр. Онно чыыһылата, бириэмэтэ, геолокацията кэлим “тиһиллэр”.

Учаастак сыа хаарынан көрөн турар

Дуоһунастаах сирэй маннык түбэлтэҕэ быраабы араҥаччылыыр уорганнарга сайыбылыанньа хайаан да суруйуохтаах. Суруйбатаҕына сиринэн махинацияҕа кыттыгастаах курдук көрүллэн, эбэтэр холуобунай буруйу көрөн туран биллэрбэтэҕин иһин дьыалаҕа хабыллыан сөп.

Кырата “превышение должностных полномочий” диэн баайсыахтарын сөп.

Саҥа дьыл иннинээҕи сүпсүлгэҥҥэ полиция үлэһиттэрэ соло булан Кэнтиккэ тахсыбакка хаалаллар.

Бырааһынньык кэнниттэн тахсыбыттара, ол уһаайбаҕа ханнык эрэ гараһы состорон аҕалан туруорбуттар. Дьыала “хаахтыйбытын” билэннэр, тутуу былдьаһыыта бардаҕа!

Состорон аҕалбыт гаражтарын холлоҕоһо

КУМИга киирбит докумуонун быһыытынан, гараж 2023 сылга тутуллан бүппүт диэн сурулла сылдьар. Оттон соһуллан кэлбит гараж, быһа холоон, 80 бырыһыан тутуллубут курдук. Өссө иэнин кээмэйдиэххэ баара.

***

Интэриэһинэйэ диэн, кэлин биллибитэ, Валентина Софронова билигин улуус баһылыгын дуоһунаһыгар дураһыйа сылдьар Валерий Николаев эдьиийэ буолан таҕыста. Бадаҕа, ийэтин бииргэ төрөөбүт балта.

Кини билигин Ватсап ситимигэр биир кылаабынай “морализатор” буолан олорор. Тыый, төрөппүт кыыһын кытта сиэри-сигилини кыраҕытык маныыллар диэн билэр дьон сибис гыммыттара. Бадаҕа, бэйэ иннигэр баҕана саҕаны көрбөккө, киһи иннигэр кыл саҕаны кылатан…

Билигин сайыбылыанньа экономическай буруйу оҥорууну утары охсуһар отделга (ОБЭП) тиийэн сытар, бэрэбиэркэ барар. Таарыйа эттэххэ, суох гаражка сымыйа техническэй былааны оҥорбут кадастровай инженер эмиэ “дуоһунаһын туһанан буруйу оҥоруу” иһин тардыллыахтаах.

Билиҥҥитэ биллибитинэн, кадастровай инженер эмиэ албыннаппыт диэххэ. Киниэхэ маннык гараж тутулунна диэн дьоһуннаах көрүҥнээх гараж хаартыскатын уонна илиинэн тардыаламмыт, муннугар гаражтаах уһаайба схематын ыыппыттар. Докумуону итинник ыраахтан оҥорор төһө сөптөөҕүн быраабы араҥаччылааччылар быһаарыахтара.

Кадастровай инженергэ маннык гараж тутуннубут диэн ыыппыт хаартыскалара…

Уһаайба сиринэн махинациялааһын курдук омсолоох быһыы Үөһээ Бүлүүгэ тахса илигэ. КУМИ үлэһиттэрэ, саарбахтыыр түгэннэригэр, бэрэбиэркэлиир этилэр да, баччааҥҥа диэри итинник албыннааһыҥҥа түбэһэ иликтэрэ. Бу бастакы түбэлтэ.

Үөһээ Бүлүү дьонун ортотугар албын-көлдьүн олус элбэҕэ суох. Хахсаат соҕус да буоллар, көнө майгыбытынан биллибит дьон буоллахпыт.

Өйдүүгүт дуо, күһүн тугу эрэ тиҥсирийэн автоматтаах “маски-шоу” кэлэ сылдьыбытын? Бэл, оннук оҥостон кэлэн бараннар, хотон тутуллан турарын көрөн итэҕэйбиттэрэ.

*Бу, сахалыы-махалыы эттэххэ, муниципальнай сири уорууга холонуу буолар. Холобур, олохтоох дьаһалтаттан сири “түүлэһэн” баран, кэлтэгэй кэппиэйкэни ороскуотурбакка бас билиигэ ылаҥҥын ботуччу сыанаҕа атыылыырыҥ дэлэ үчүгэй буолуо дуо?*

Оччотугар уоллара муниципалитет баһылыга буоллаҕына тугу ордороллоруй?

Ол эрэн, сүрэ бэрт! Алыс эрдэлээн түстүгүт буолбатах дуо! Фальш-старт. Кыана түһүөххүтүн, саатар, уолгут баһылык буолбутун кэнниттэн…

Сураста, сурукка тистэ – *СУР.*