Боотулуу нэһилиэгэ тэриллибитэ 250 сыла

Быйыл Боотулуу нэһилиэгэ тэриллибитэ 250 сыла. Онно аналлаах тэрээһиннэр быыстала суох ыытылла тураллар. Кулун тутар 20 күнэ Боотулууга биир бэлиэ күнүнэн буолла. Ол курдук нэһилиэкпитигэр “ҮҮНЭ – САЙДА ТУР, БООТУЛУУМ” диэн киэһэни сынньалаҥ киин үлэһиттэрэ тэрийэн ыыттылар.

⠀⠀Онно төрдүс төгүлүн “Боотулуу нэһилиэгэ” муниципальнай тэриллии норуот хаһаайыстыбатын бириэмийэтин туттарыы үөрүүлээх быһыыга-майгыга ааста.
⠀⠀Ону таһынан, Саха Өрөспүүбүлүкэтин Ил Дархана Айсен Сергеевич Николаев 2021 сылы Доруобуйа сылынан биллэрбитин бэлиэтээн нэһилиэкпит аҕам саастаах ыалларыгар “Чөл олохтоох дьиэ кэргэн” ааттары иҥэртээтибит.
⠀⠀Өйдөбүнньүк бэлиэни уонна добун суругу 11 ыал ыллылар:
1. Матрена, Федот Алексеевтар;
2. Розалия, Алексей Николаевтар;
3. Анастасия, Михаил Петровтар;
4. Анна, Михаил Яковлевтар;
5.Розалия, Иван Федотовтар;
6. Любовь, Василий Васильевтар;
7. Зоя, Данил Даниловтар;
8. Наталья, Николай Кисиляховтар;
9. Раиса, Ариан Ксенофонтовтар;
10. Мария, Герман Афанасьевтар;
11. Варвара, Александр Буртаховтар.

⠀⠀Бириэмийэлэри нэһилиэкпит аҕа баһылыга Александр Семенович Поскачин доруобай олох, чөл турук туһугар туруулаһар сүҥкэн суолталаах үлэлэрин учуоттаан туттарылыннылар.
Маннык хабааннаах тэрээһиннэр сыл устата барыахтара.

⠀⠀Үөрүүлээх тэрээһиммит иккис чааһа эҕэрдэ кэнсиэринэн түмүктэннэ. Кэнсиэркэ оскуола кэлэктиибэ (дир. Васильев А.А.) Боотулуу гимнин ыллаан ньиргиттэ, олохтоох хоһоонньуттар Боотулуу туһунан дьүһүйүү хоһооннорун аахтылар, Боотулууттан төрүттээх мелодистар ырыалара эмиэ ылланан көрөөччү астынан барда диэтэхпинэ сыыспатым буолуо. Уруккуттан баччааҥа диэри Боотулуу аатын ааттата сылдьар “Алаас оҕолоро” уонна “Сарыал” ансаамбыл үҥкүүһүттэрэ имигэс  үҥкүүлэринэн биэчэри киэргэттилэр. Талааннаах ырыаһыттар Алексей Борисов, Август Максимов ылбаҕай ырыалара саалаҕа мустубут дьон сүрэхтэрин минньиттэ.

⠀⠀Дьокуускай куораттан ыҥырыллан кэлбит, элбэх ырыа күрэхтэрин кыайыылааҕа ааты ылан Боотулууну элбэхтэ ааттаппыт айылҕа маанылаах куолаһа Михаил Спиридонов ыллаан дуораһытан, саала иһигэр ытыс хабыллар тыаһа бүппэттик ньиргийэн олордо.
⠀⠀Оҕолорбут, кэнэҕэски кэнчээри ыччаппыт талба талаана, айылҕаттан бэриллибит дьоҕура, сайда турар сатабыла – биһиги ураты тыыннаах дьоһуннаах нэһилиэк буоларбытын өссө төгүл туоһулаата!!! “Биһиги күүспүт –  түмсүүгэ!!!”,- диибит.
⠀
Боотулууттан Марта Архипова.