Владивостокка долган рок музыката ньиргийдэ

Бу ый балаҕан ыйын саҥатыгар  Владивосток куоракка ыытыллыбыт ВЭФ илиҥҥи экономическай форумҥа ыытыллыбыт “ДУША РОССИИ СЕВЕР” фестивальга Саха сириттэн кыттыбыт Маргарита Попова салайааччылаах “Кындыкан” айар проект командатыгар киирэн, Анаабыр  Үрүҥ-Хайатыттан Сергей Сыроватскай салайааччылаах “Элдэн”(сахалыы «Дьүкээбил») вокальнай инструментальнай ансамбль ситиһиилээхтик кыттыннылар.

       Форум культурнай тэрээһиннэрин площадкаларыгар хотугулуу тэтимнээх айан долган рок музыката ньиргийэн болҕомтону тартылар.”Элдэн” рок бөлөх бу улахан тэрээһиҥҥэ туундараҕа айаны кыһыҥҥы көстүүнү     туойда.
       Николай Попов «Айанньыт дулган ырыата», Егор Кылтасов-Дьөккөө «Маҥан хаарым ойууһут» диэн айбыт ырыаларын тэтимнээх рок музыкаҕа таһааран ыллаатылар. 
       Анаабыр улууһун хамаандатыгар  дизайн колледжын устудьуона Сандаара Порохонько бэйэтин оҥоһуктарынан кытынна.Делегацияны улуус баһылыга Эдуард Петрович Платонов салайан илдьэ сырытта.
«Элдэн» рок группаҕа солистар Сергей Сыроватскай уонна Гаврил Спиридонов, бас гитараҕа Федор Туприн бааллар. Онтон бөлөх сорох састааба Анаабыртан  кыайан куоракка кэлбэккэлэр,   Якутскайтан музыканнар Сергей Павлов ударнай инструменнарга, Айтал Осипов соло гитараҕа кыттаннар күүс көмө буоллулар. Аранжировкатыгар музыкант Михаил Перетертов көмөлөстө.
Онон  долган рок группатын уонна Кындыкан айар бырайыак хамаандатын аатыттан
Анаабыр улууһун салалтатыгар баһылык Платонов Э.П., баһылык
солбуйааччытыгар Иосиф Владимировичка улахан барҕа махталы тиэрдэллэр!