Саха учуонайдара сүбэлииллэр. Атыыр оҕус, удьуору учуоттааһын уонна “ынах үүтэ тылыгар” (видео)

Саханы саха оҥорбут сүөһүбүт буоллаҕа. Саха төрүт ынаҕа буоллун, тупсарыллыбыт, ол эрээри хаһан да “киэр, омук сүөһүтэ” диэбэт симментал аҥаардаах барахсаттарбыт буоллун, аһатар-сиэтэр силиспит кэриэтэ буоллахтара.

Сүөһү иитиитэ судургу “хара үлэ” буолбатах. Үгүһү билиэххэ-көрүөххэ наада. Аныгы үйэҕэ ону наука ыйыыта-кэрдиитэ буолуохтаах этэ даҕаны, “үйэ уларыйар”, дойду сатарыйар кэмнэригэр “бэйэ хааһытыгар” булкуллуу барбыта мэлдьэх буолбатах.

Дьэ, сүнньүбүт көнүөх курдук буолла. Биллэн турар, ыарахаттар элбэхтэр эрээри, олору туоруурга аҥаардас былааһы өрө көрөр тутах – учуонайдар бааллар эбээт. Өркөн өйдөрүн, сыраларын-сылбаларын туһааннаах хайысхаларга анаабыт, үгүһү билбит-көрбүт, тобулбут, толкуйдаабыт дьон. Олору истэр-билэр төһө-хачча буолуой диэн туран, СӨ үтүөлээх зоотехнига, СӨ тыатын хаһаайыстыбатын туйгуна, Мэҥэ Хаҥалас улууһун 2-с Наахара нэһилиэгин бочуоттаах гражданина, М.Г. Сафронов аатынан ТХНЧИ селекцияҕа уонна ынах сүөһүнү иитиигэ лабораториятын научнай үлэһитэ Никанорова Мария Ивановна сүбэлэрин истиҥ.

Ааптар: Алексей Пудов