Ковид-19 уонна кэм-кэрдии эргиирэ: илэ баар таҥаралар, илэ сылдьар абааһылар

Күн бүгүн Ковид-19 хамсыгын туһунан эҥинэ тойоннооһуннар элбэхтэр. Сорох лабораторияларга соруйан үөскэтиллибит уонна аан дойдуга дьон ахсаанын аҕыйатарга анаммыт вирус диир. Сорох айылҕаттан  төрүттээх, ол эбэтэр таҥара накаастабыла диир. Хайата баҕарар буолуон сөп.

• Чэ, айылҕаттан, ол эбэтэр таҥара ыйааҕынан тарҕаммыт ыарыы буоллаҕына, биһиги ону утары тугу да куолулуур кыахпыт суох. Былыр былыргыттан баар быһыы. Киһи-аймах историятыгар, ама, ыарыы туруута аҕыйах үһү дуо, баһаам буоллаҕа. Ол аайы ыарыыны утары охсуһуу, өрүһүнэр суолу көрдөөһүн барара. Хастыы да түһүмэҕинэн.  Бастаан утарытынан, ол аата баар билиини-көрүүнү, кыаҕы-кыамтаны, күүһү-күдэҕи туһанан быыһана сатааһын. Ону сэргэ ыарыыны сыныйан үөрэтии, чинчийии. Онтон үтүөрдэр эми-тому булуу, сэрэтэр, ол эбэтэр профилактикалыыр эми айыы, быһыылары  ыытыы (прививка). Барыта билим туругуттан, учуонайдар таһымнарыттан тутулуктаах.

Ону кытта доруобуйа харыстабылын туругуттан. Медицина таһыма төһө да үрдүк буоллун, доруобуйа харыстабылын тиһигэ, систиэмэтэ суох буоллаҕына, ыарыыны бохсубаккын. Ону Ковид-19 ыарыыга саамай холобур оҥостор АХШ уонна Европа судаарыстыбалара улаханнык эмсэҕэлээбиттэрэ туоһулуур. Бу дойдуларга медицина таһыма төһө да үрдүгүн иһин, доруобуйа харыстабылын тиһигэ барбах эрэ баар. Харчылаах буоллаххына эмтэнэҕин, суох буоллаҕына, суох.

• Дьэ, оттон соруйан оҥоһуу, дьону-сэргэни соруйан сутуйуу буоллун?

Маннык толкуйдуур буоллаххына, эн “аан дойдутааҕы саагыбары” итэҕэйэҕин диэхтэрэ. “Акаарыга дылы конспирология түөрүйэтин тутуһаҕын дуо?” – диэн сирэй-харах анньыахтарын сөп.

Кырдьык, аҕыйах сыллаахха диэри ити туһунан тыл быктарар киһини күлүүгэ ыытар этилэр. Атыннык эттэххэ, бары өттүттэн “обструкциялыыллара”. Ол аата, намтата-түһэрэ, хам баттыы сатыыллара. Үөрэхтээх, өйдөөх киһи конспирология түөрүйэтин итэҕэйиэн табыллыбат диэн буолара. “Өйдөөх” аатыра сатааччы элбэҕин муҥа сыттаҕа дии, онон үгүс дьон көх-нэм буола сатаахтыыра.

Дьиҥэ, “саагыбар” диэн бу орто дойдуга үс киһи үөскүөҕүттэн баар быһыы буоллаҕа. Хаспахха үс буолан “үмүөрүһээт” саагыбардаһан, ол аата куомуннаһан барбыттара буолуо дии саныыбын – өбүгэлэрбит барахсаттары. Билигин ырыынакка үс атыыһыт көрсүстэ да куоманнаһа охсоллор буолбат дуо, хайдах гынан дьонтон элбэх харчыны суймуурдуубут диэн? Оттон аан дойдуну баһылыыр туһугар ким даҕаны куомуннаспата буолуо диэн, бырастыы гыныҥ, кыра оҕолуу өс киирбэх эрэ киһи итэҕэйиэн сөп.

Дьэ, кимнээх ыарыыны ыыттылар? Сорох киһи кытайдар диир. Сорох американецтар диир. Сорох “аан дойдутааҕы бырабыыталыстыба” диир.

Биһиги “өлүү сирин түгэҕиттэн төргүүлээх” кистэлэҥнэри билбэппит, тугу көрөрбүтүнэн, тугу билэрбитинэн, тугу аһаҕастык суруйалларынан эрэ удамырдыыр кыахтаахпыт.

“Кыһыл көмүс тарбыйах”, ол эбэтэр хапытаал былааһыгар саамай күүстээх тугуй? Харчы. Ханнык харчы? Аан дойдутааҕы валюта, ол эбэтэр, дуоллар.

Оттон дуоллары бэчээттиир АХШ Федеральнай резервнэй систиэмэтэ (ФРС) аата эрэ “федеральнай” тэрилтэ. Дьиҥэ, кэтэх бас билиигэ баар. Аахсыйалаах уопсастыба.

Ол эбэтэр, аан дойду баайын барытын дуолларынан кээмэйдиир, атыылаһар-атыылыыр буоллахтарына, аан дойдуну бас билээччилэр кимнээхтэрий? Саамай сөп – ФРС хаһаайыттара!

Ол эбэтэр, АХШ кыаҕа-кыамтата хантан силистээҕий? Дуоллар хаһаайыттарыттан. Ол маҥай аллаахтар, ол улуу дьаалылар ыйар-кэрдэр бэлиитикэлэринэн салайтарар – АХШ судаарыстыбата.

Бу АХШ судаарыстыбатынан сирэйдэммит дуоллар импиэрийэтэ. Европа буоллун, Япония уонна да атын сайдыылаах аатырар дойдулар буоллуннар, бу импиэрийэҕэ киирэллэр. Импиэрийэ “филиаллара”. Ону таһынан АХШ сэриилэрэ, “байыаннай базалара” турар судаарыстыбалара бары оккупацияҕа олороллор. Чыып-чаап диир кыахтара суох.

Таарйыа эттэххэ, биһиги “олигархтарбыт” ФРС хаһаайыттарын хамначчыттара буолаллар. Кинилэр баайдарын “управляющайдара”. Онон баҕардахтарына кинилэртэн былдьаан ылыахтара, кинилэри “ыстаана суох хаалларыахтара”.

Аны туран, биһиги дьоммут “Путин олус уһуннук олордо”, “биир баартыйа эрэ былааһы тутан олорор” диэн муҥнарын ытыыллар. Ол эрэн, ФРС хаһаайыттара бэркэ билэллэр – былааска уларыйыы-тэлэрийии үчүгэйгэ тиэрдибэтин. Ол иһин АХШ уонна да атын “филиал” судаарыстыбалар иккилии эрэ баартыйалаахтар. Солбуйса сылдьан парламеҥҥа хаһаайынныыллар. Ол аайы туох да бэлиитикэ, судаарыстыба тутула уларыйбат, арай харчы былдьаһыытыгар ар-бур дэсиһии барар.

Оттон ФРС Управляющайдарын сэбиэтин чилиэннэрэ (“совет директоров” диэххэ)  АХШ президенин, Конгресс чилиэннэрин хас да болдьохторун саҕа уһун кэмҥэ талыллаллар. Ол эбэтэр, президент уонна кэнгириэс чилиэннэрэ тугу да уларытар кыахтара суох.

ФРС аахсыйалаахтара (аан дойду хаһаайыттара, “аан дойду бырабыыталыстыбата”) бэркэ диэн билэллэр: кыыллар эрэ сыллата атын атын атыыры-тыһыны кытта иссэллэр, оттон киһи биир “бастаах” буолуохтаах. Кинилэргэ уларыйыы, арай, киһи үйэтэ кылгаһын учуоттаан барар. Аан дойдуну бастакынан баһылаабыт Великобритания “ыраахтааҕылаах тутулун” – королеватын, билигин да тутан олорор. Дьөрү, Конституцията да суох.

Онон дьиҥнээх былаас “арҕаҕар” ханнык да дэмэкирээтийэ сыта да суох. ФРС хаһаайыттара уларыйбаттар, Салайар сэбиэтин чилиэттэрэ сүүрбэлии сыл олороллор. Оттон АХШ президеннэрэ диэн көрүнньүк “күлүктэр” буоллахтара. Дуоллар хаһаайыттара баҕардахтарына ньиэгири туруоруохтара, баҕардахтарына эдэри, баҕардахтарына кырдьаҕаһы, баҕардахтарына дьахтары… АХШ норуота манна туох да сыһыана суох. Быыбар диэн – шоу! “Барааннарга” аналлаах. Джон Кеннеди ФРС хаһаайыттарын утары “бөө” диэбитин дуораана да сүтэ илигинэ “тос” гыннарбыттара. Де Голль дуоллар күрүчүөгүттэн арахсаары мөхсөн көрбүтэ да, сонно тута Европаҕа бастакы “саһархай” өрөбөлүүссүйэ нөҥүө былаастан киэр быраҕыллыбыта. 

•  АХШ судаарыстыбата хайынна. Үгэс буолбут утарсыы – республиканецтар уонна демократтар икки ардыларыгар “трампистар” баар буоллулар. Ол эбэтэр АХШ “национальнай” судаарыстыбата ФРС (глобалистар) дьаһалыттан тахсарын туһугар туруулаһааччылар.  

Бу эмиэ соруйан оҥоруу буолуон сөп. Дьону утарыта туруортааһын олус кылбардык оҥоһулунна. Ол аата тугуй?

Ол аата, дуоллар хаһаайыттара “сир уларытаары” гыммыттар. АХШ судаарыстыбатын “кидайдаан” туран. Бу сабаҕалааһын туһунан мин урут нууччалыы-сахалыы хаста да суруйан турабын.

“Иэс пирамидатыгар” кубулуйбут дуоллары атын валютанан солбуйуохтара. Ол улахан буолбатах.  

Ханна “сир уларыйыахтарын” сөбүй? Биир эрэ сир баар – Арассыыйа. Тоҕо диэтэххэ, аан дойду үрдүнэн Арассыыйа ийэ хотун эрэ чиҥ сиргэ турар. Уоннааҕы “улахан экэниэмикэлэр”, ол иһигэр Кытай, саамай көп күөбүргэннэрэ, бука бары акыйаан арыыларыгар бааллар эбэтэр акыйаан кытылларын батан сыталлар. Бары ууга барар кутталлаахтар.

Бэйэҕит билэҕит, этэргэ дылы, “бэстилиэннэй тыһыынча” чугаһаабытын, сир хамсааһыннара, силлиэ-буурҕа, улуу холоруктар олус элбээбиттэрин, акыйаан уута субу-субу таһынан дьалкыйар буолбутун. Быһата, дуоллар хаһаайыттара чиҥ, бөҕө-таҕа, туруктаах сири көрдүүллэр. Библияҕа суруллубут “улуу мотуок” хаһан бычалыйан тахсыан ким да билбэт.

Бэйэҕит санааҥ көрүҥ. Арассыыйаны 90-с сыллар усталарыгар халаабыттара. Ол содулугар, били, хара уол Обама этэрин курдук, “экономиката тырыта тыытыллыбыт” аатырбыта. Туох да омуна суох, күлэ-күлэ күлүн таптайаллара эрэ хаалбыта. Ол бэйэтэ аан дойдуга саамай сайдыылаах, саамай үрдүк технологиялаах сэрии сэптээх буолан барыларын соһуппута. Оттон коронавируһу утары вакцина диэн тугуй? Бу олус үрдүк технологиялар. Көрөөрүҥ да истээриҥ, Арассыыйа вакцината аан дойду үрдүнэн саамай көдьүүстээх, саамай туһалаах буолуоҕа. Харчы, харчы уонна өссө төгүл харчы.

Быһата, Арассыыйа халлаантан таҥара, орто дойдуга “аан дойду бырабыыталыстыбатын” дабыдалларын анныгар сылдьар бадахтаах. Ити эстиэ, субу ыһыллыа диэн мэнэрийэн туһа суох.

• Оччотугар Ковид-19 дьаҥ хантан күөрэйдэ? “Киһи-аймах өстөөхтөрө” ыыттылар дуу, таҥара накаастабыла дуу?

Һэ-һэ, син биир буолбатах дуо, хайата даҕаны. Билигин киһи үксэ “кыһыл көмүс тарбыйахха” үҥэр. Онон ыарыыны “аан дойду бырабыыталыстыбата” тарҕатар буоллаҕына, эҕэрдэлиибин, бэйэлээх бэйэҕит “таҥараҕыт” накаастабылын курдук ылыныҥ.

Оттон “тарбыйах” таҥарата суох дьон толкуйдаан көрүҥ – аан дойду бары муннуктарыгар тоҕо АХШ “биологическай лабораториялара” баалларый? Ыксары “сэкириэтинэйдэр”, тугунан дьарыктаналларын кимиэхэ да эппэттэр. Арассыыйаны уонна Кытайы тула. Бу лабораториялары туруорарга көҥүл биэрбит судаарыстыбалар, Украина буоллун, Казахстан буоллун, Грузия буоллун, бука бары “уопут оҥоһуллар куруолуктара” буолаллар.

Саамай дьээбэтэ, АХШ норуота, сэрииһиттэрэ, бэлиитиктэрэ эмиэ Кытайы уонна Арассыыйаны утары үлэлиир “лабораториялар” диэн бигэ эрэллээх буолуохтаахтар.

Ол эрэн, Ковид-19 хамсыгын Кытай да, Арассыыйа да халымырдык аһардылар. Оттон бу лабораториялар баар дойдулара, бука, удьуордаан туран эстэр суолга барар буолуохтаахтар. Тута буолбатах, сүөһүтүн ким сонно сиэн-аһаан кэбиһиэҕэй, идэһэни харыстыыр, аһатар-сиэтэр, уотар куолу.       

Ол эбэтэр, Ковид-19, кырдьык, таҥараттан аналлаах – орто дойду “кыһыл көмүс тарбыйаҕыттан” эбэтэр халлааннааҕы Айыы Таҥараттан. Тускутугар хайата ордук чугаһын бэйэҕит талыҥ.

Киһи-аймах ахсаанын аҕыйатар сорук турар дииллэр. Ким билэр, дьэ. Ол Томас Мальтус үйэтигэр, ол аата 18-19 үйэлэр кирбиилэригэр оннук өй-санаа үөскүү сылдьыбыта мэлдьэх буолбатах. Оттон билигин? Нэһилиэнньэ ахсаанын аҕыйатыы улахан сүгэһэр буолбатах. Миллиардынан өлүгү дьаһайар баар – ыарахан сорук. Оттон дьон болҕомтотун туоратар туһугар көрүнньүк “масоннар” тугу баҕарар куолулуохтара. 

Сүрүн сорук – орто дойду былдьаһыга. Хартленд – сердцевина земли, срединная земля. Көрөргүт курдук, олоҥхо тылыгар “орто дойду” өйдөбүлэ хаалан хаалбыт. Аар айыылартан, ол эбэтэр, ааспыт цивилизацияттан.        

Усулуобунай “улуу мотуок” син биир кэлиэҕэ. Оттон аан дойдутааҕы акыйаан саамай улахан арыыта – Арассыыйа. Библия Арарата.

Онуоха табыгастаах күн-дьыл үүннэ. Урукку курдук климат тыйыһыгар, идеологияҕа, национальнай судаарыстыбалар элиталарын утарсыыларыгар болҕойбот күн-дьыл үүннэ. Харчы таҥара буолла. Технология буоллун, билии-көрүү, доруобуйа буоллун – барыта харчыттан тутулуктаах. Билигин оҕону харчы төрөтөр – кыыл оҕото буоллун, киһи оҕото буоллун. Үлэһит уонна сорук-боллур роботтары харчы оҥорор уонна оҥоруо. Аһы-үөлү урут күн уонна сир төрөтөн таһаарар буоллахтарына, билигин туһааннаах технологиялар оҥорон таһаараллар.

Түҥ былыргы аан дойду үһүйээннэригэр хайдах этэй? Таҥаралар көннөрү дьону кытта тэҥҥэ сылдьаллар. Кинилэртэн саамай кыахтаахтара ханна олороллор этэй? Оол көстөр хайаҕа. Баара-суоҕа. Холобур, Олимп хайатыгар – халлааҥҥа буолбатах. Манна диэн эттэххэ, абааһылар эмиэ илэ сылдьаллара. Дьэ, ол улуу дьаалылар киһи ахсаанын сөрү-сөпкө сарбыйар буолуохтаахтар. Кэм-кэрдии эргиирэ оннук.

Сурукка тистэ – СУР.