Үөһээ Бүлүүтээҕи киин балыыһаҕа соһуччу үөрүү буолла.

Семен Дмитриевич Иванов, билигин бочуоттаах сынньалаҥҥа олорор Билиилээх түөлбэ олохтооҕо, коронавирус саҥа инфекциятын утары “кыһыл зонаҕа” үлэлии сылдьар быраастарга: ковиднай салаа инфекционист бырааһыгар Ньургуйаана Валерьевна Санниковаҕа, Үөһээ Бүлүүтээҕи провизорнай салаа салайааччытыгар, быраас-терапевт Василий Федотович Ксенофонтовка, Хоротооҕу провизорнай салаа салайааччытыгар, быраас -терапевт Кельциев Александр Владимировичка, тоҥнуу биирдии куул өрүс балыгын бэлэхтээтэ.

Семен Дмитриевич ийэтэ Валентина Александровна Иванова Үөһээ Бүлүүтээҕи төрүүр дьиэҕэ акушер-фельдшеринан 31 сыл устатаэ харыс да сири халбарыйбакка үтүө суобастаахтык үлэлээбитэ. Кини “чэпчэки” илиитин иһинэн 2000-н тахса саҥа кырачаан киһи күн сирин көрбүтэ. Валентина Александровнаны махталынан ахтар, сырдыгынан саныыр ийэ билигин да үгүс. Кэргэнэ Дмитрий Максимовичтыын биэс уолу күн сиригэр көрдөрбүттэриттэн, Семен төрдүс уол буолар. Аҕалара эрдэ өлөн уолаттар аҥардас ийэҕэ иитиллибиттэрэ. Ийэлэригэр туохха барытыгар көмөлөһө үөрэммит бүгүрү уолаттар улаатан, хайҕалга сылдьар туруу үлэһит дьон буолбуттара.

Хонуктаан үлэлиир, өрүү балыыһа сыттаах ийэлэрин өйгө- сүрэххэ дириҥник иҥэриммит буоланнар, балыыһа ис эйгэтин ыраахтан да буоллар сураһан билсэ олороллор.

Ону Семен Дмитриевич бэйэтэ бу курдук этэр: “Ыарахан дьаҥ турда. Саатар уһаан, ааһан-араҕан биэрбэтэ сүр. «Кыһыл эонаҕа” үлэлиир быраастар барахсаттар үчүгэйдик аһаабакка-сиэбэккэ, эрэйи көрдүлэр, сылайдылар даҕаны. Ол иһин тугунан эмит көмөлөспүт киһи диэн бокуойдаах киһи быһыытынан, балыктаан мунньан аҕаллым. Ыарыы этэҥҥэ ааһара буоллар…”.

Оннук! Ыарыы этэҥҥэ ааһара буоллар…диэн баҕа санаалаах утуйар, оннук санаалаах уһуктар буоллубут.

Ытыктабыллаах Семен Дмитриевич!

Эйиэхэ киин балыыһа салалтата, үлэһит кэлэтиибэ, эмчиттэр доруобуйаларын туһугар кыһаллар үтүө дьыалаҕар олуһун үөрэбит, улаханнык махтанабыт. Кытаатан ыалдьыбакка этэҥҥэ сырыт. Тус олоххор дьолу-соргуну, үөрүүнү ис сүрэхтэн баҕарабыт. Оҥорбут үтүөҥ сүүс төгүл эбиллэн бэйэҕэр тиийдин!

Источник: https://mr-verhneviljujskij.sakha.gov.ru/