Yakutians.com

Новости Якутии

Сахаҕа да баай дьон баар буоллуннар эбээт…

Муус устар ыйга “Открытые медиа” интернет-таһаарыыга Наталья Кузнецова ыстатыйата тахсыбыта: “Жена руководителя Якутии будет зарабатывать на добыче алмазов в республике” диэн ааттаах. Манна ааҕааччы, дьиҥэ, “будет” диэн тылга болҕомтотун ууруон сөп этэ. Сабаҕалааһын. Мээнэҕэ этиллибэт: киһи сабаҕалыыр, таҥара оннун булларар.

Дьэ, бу сурах сиэллэнэн-кутуруктанан турбат дуо: баһылыкпыт ойоҕо миллиардер үһү; олигарх эбит…

Айсен Николаев бу туһунан этэн турар: мин кэргэним алмаас хостооһунунан буолбакка, алмааһы көрдөөһүнүнэн дьарыктанар. Быһата, геологиянан.

Людмила Николаева 2020 сылтан ыла “Арктикатааҕы хайа хампаанньата” (Арктическая горная компания – АГК) ХЭУо 40 % аахсыйаларын бас билэр диэн буолла.

Бу хампаанньа 2016 сылтан ыла хоту Хатыыстаах уонна Бэһэнчимэ диэн тарҕам алмаастаах сирдэргэ геология-чинчийэр үлэни ыытар. Бу чинчийэр-көрдүүр үлэҕэ барыта 70 мөл. солк. инвестиция тардыллыбытын туһунан этэллэр. Наһаа элбэх харчы буолбатах. Кыттыгас үбүлээһин буоллаҕа. Аахсыйалаахтар ортолоругар “Леназолото” урукку гендириэктэрэ Павел Андреев (20 %), “Графен” инновационнай тэрилтэ бас билээччитэ Роман Ноговицын (15%), “Полярная горная компания” биир бас билээччитэ Сергей Граханов (15%), “Поларктик Менеджмент” фирма (10%) бааллар.

АГК алмааһын саппааһа миллиард дуоллар кэриҥэ диэн сыаналыыллар. Тоһоҕолоон бэлиэтиир сөп: бу билиҥҥитэ сир анныгар сытар сабаҕаланар алмаас. Ону хостуу уонна атыылыы иликкинэ хайдах да “миллиардер” буолар кыаҕыҥ суох.  

Урбаанньыт киһи сайдар суолу үйэтин тухары көрдөөтөҕүнэ табыллар. Людмила Николаева 2004 сылтан бас билэр “Якутснаб” кууһунан эргинэр хампаанньатын, “Передовые медицинские технологии” фармакология хампаанньатын, Табаҕатааҕы мас эрбэтэр хампаанньатын оннугар алмаас көрдөөһүнүгэр киирбитэ, дьиҥинэн, хайҕаныан эрэ сөптөөх.

Биллэн турар, АГК чинчийбит учаастактарыгар алмаас хостооһунунан дьарыктанар, онуоха лиссиэнсийэ ылар соруктаах. Күн бүгүн ол туһугар инвестициялары тардыыга үлэ барар.

Дьэ, ол инвестициялары тардыы, сахалыы эттэххэ, харчы уксуутун кэнниттэн кимнээх хаһаайынынан тахсыахтарын билигин ким да билбэт. Арассыыйаҕа халыҥ харчылаах дьон элбэх – харчынан “баалкылааһын” түмүгэр “тииҥин ичигэстээһин”, ол эбэтэр алмааһын хостооһун кимнээххэ тиксиэҕин тойоннуур ыарахан.

Сахалар олус былдьаппаттар ини диэн бүк эрэнэрбитигэр тиийэбит.

Уопсайынан, капитализм тутулугар олорорбут быһыытынан, сахаҕа да баай дьон бааллара бэрт этэ. Көрөр-истэр тухары баай дьон бары омуктар – нуучча аҕыйах, саха букатын да суох. Татаардар, кавказтар, узбектар, дьэбириэйдэр… Саха эрэ суох. Баар буоллуннар.

Сураста, сурукка тистэ – СУР.    

Поделиться
%d такие блоггеры, как: