Yakutians.com

Новости Якутии

Октябрь Лукин бэс чагдата…

Кырдьаҕас Бүлүү куоратыттан чугас соҕус, арҕаа диэки барыыга айан суолуттан көстүбэт да буоллар, кырылас кумахха бэрдьигэстэр уһун субурҕалыы кэккэлэһэ үүнэн туралларын дьиктиргии көрөҕүн.

Айылҕа барахсаҥҥа бэс хайдах да итинник бэйэтэ үүммэтэ биллэр. Силигилии үүнэн эрэр күөх бэрдьигэстэрдээх, кэнэҕэс эмтээх салгыннаах бэс чагда – киһи үлэтин түмүгэ буолар. Өссө 2012 сыллаахха Бүлүү улууһун лесничествотын кэлэктиибэ дуогабарынан Бүлүү куорат чугаһыгар туттуллубут кумах карьерын чөлүгэр түһэриигэ ылсан 10 гектардаах сиргэ саҥа быган эрэр бэрдьигэстэри олордубута.

Билигин “Үгүлээт нэһилиэгэ” муниципальнай тэриллии дьаһалтатын баһылыгынан хаһыс да болдьоҕун талыллан ситиһиилээхтик үлэлии сылдьар Октябрь Лукин ол саҕана Бүлүү лесничествотын лесничэйинэн үлэлээбитэ. Кини лесничествоҕа үлэлиир кэмигэр араас өрүттээх үлэ ыытыллыбыта, биир көрүҥүнэн, сири чөлүгэр түһэрии үлэтин ыытыы этэ.

10 сыл буолан бэс мас олордубут сиригэр сылдьан Октябрь Лукин аллея курдук тэҥҥэ үүнэн тахсыбыт бэрдьигэстэри көрөн үөрэр-көтөр, астынар:

– Уонча сыллааҕыта лесничество кэлэктиибэ Бүлүү куорат чугаһыгар федеральнай суол тутуутугар туттуллубут кумах карьерын чөлүгэр түһэриигэ үлэлэспиппит. Суол тутааччылар кумах ылан улахан дириҥ оҥхой оҥорбут сирдэрин бульдозерынан тэҥнээбиппит, атын сиргэ ойуур баһаарын кэннэ чөмөхтөһө үүнэн тахсыбыт кыра бэрдьигэстэри, кэнэҕэс бэс чагда үүнэрин курдук сорохторун хаалларан, ылан көһөрбүппүт. Карьерга УАЗ массыынанан бэрдьигэстэрдээх тэлиэскэни состоро сылдьан нэдиэлэни быһа олордубуппут. Бэйэтин туһугар элбэх үлэни көрсүбүппүт.

Мас олордуутун үлэтин ол саҕана лесничество сүрүннүүр испэсэлиистэрин: билигин Тылгыны нэһилиэгин баһылыга Егор Иванову, “Якутлесресурс” ГАУ Дьокуускайдааҕы киинигэр үлэлиир Арсен Егоровы кытта иилээн-саҕалаан ыыппыппыт. Кырылас кураанах кумахха бэс ойуур үүнэн эрэрин киһи дуоһуйа көрөр, – диир Октябрь Лукин.

Мас олордуута тулалыыр айылҕабытын харыстааһыҥҥа сүҥкэн кылааты киллэрии буолар. Бастакынан итинник үлэни саҕалаабыт Бүлүү улууһун лесничествотын кэлэктиибин сири чөлүгэр түһэриигэ үтүө холобурун киһи хайҕыан эрэ сөп.

Бүлүү куоратын тулата кумах буолан бэс мас үүнэр дойдута. Бэл, бэс лабаата Бүлүү улууһун гиэрбэтигэр кытта киллэриллибитэ. Октябрь Лукин улуус гиэрбэтигэр киирбит “баайы-дуолу” хаҥатыыга тэрийбит үлэтэ салҕаныа, өйөнүө, тэнийиэ диэн эрэниэххэ.

Николай КУПРИЯНОВ

Поделиться
%d такие блоггеры, как: