Хоту Многоборьеҕа Үөһээ Бүлүү оҕолоро – Саха сиригэр бастыҥнар

Муус устар 1-3 күннэригэр Дьокуускайга хотугу многоборьега Бастыҥ иһин киирсэр улахан күрэх буолан ааста. Барыта 10  хамаанда кыттыыны ылла. Хамаандаҕа 14-15 саастаах кыыс, уол уонна 13 сааһыттан кыра кыыс, уол киирэллэр. Биһиги улуустан Люба Михайлова (5 кылаас, №1 оскуола), Женя Николаев (7 кылаас, №4 оскуола), Ванесса Морфунова, Эльдар Мандаров уонна Петя Кузьмин (8 кылаас, №2 оскуола) кыттыыны ыллылар.

⠀⠀Биэс көрүҥ түмүгүнэн 10 хамаандаттан 43 очколаах Үөһээ Бүлүү хамаандата бастаата. 44 очколаах Анаабыр иккис миэстэ, Өлөөн хамаандата үһүс бириистээх миэстэлэргэ тигистилэр.
⠀⠀13 сааһыгар дылы кыргыттарга Люба Михайлова куобах ыстаныытыгар 6м.45см. ойон – иккис, 1 км. мастаах сүүрүүгэ – иккис, наартаҕа 300 ойон, бастакы миэстэ буолла. Маамыктатын кыайан киллэрбэккэ, штрафной 11 очко ылан, сууммаҕа икки очконан хаалан, 2 миэстэ буолла.
⠀⠀Ванесса Морфунова куобахха 7м. 22 см. ойон – бастакы, наартаҕа бастакы, маамыыктаҕа 12 табан – бастакы, сүүрүүгэ – иккис, сүгэ быраҕыытыгар – иккис уонна сууммаҕа сэттэ очколаах тахсан 1 миэстэ буолла.
⠀⠀Эльдар Мандаров куобахха 9м. 24 ойон – бастакы, сүүрүүгэ – үһүс миэстэ, сүгэ быраҕыытыгар 114 м. быраҕан – бастакы, наартаҕа 360 ыстанан – 2 миэстэ, маамыкта быраҕыытыгар 37 табан – бастаата. Сууммаҕа 8 очколанан, эрэллээхтик бастаата. Эльдар 37 маамыктаны таба быраҕан, 14-15 саастаах оҕолорго Саха Өрөспүүбүлүкэтин рекордун туруорда. Бу иннинээҕи рекорд – 28 табыы этэ.
⠀⠀Онтон Женя Николаев 13 саастаах оҕолорго 300 наарта ойон уонна 7 м. 40 см. куобахха ыстанан, эмиэ кыра оҕолорго Өрөспүүбүлүкэ рекордун туруорда.
⠀⠀Бу курдук оҕолорбут олус кыахтаахтарын, бэлэмнээхтэрин, кыайыыга дьулуурдаахтарын өссө төгүл дакаастаан, хамаандаларын бастакы миэстэҕэ таһаардылар.
⠀⠀ДЮСШ директорыгар Уйгуров Павел Васильевичка, Альбина Васильевна Ивановаҕа оҕолор ситиһиилээхтик кыттыбыттарыгар, күүс-көмө буолбуттарыгар тус бэйэм уонна төрөппүттэр ааттарыттан барҕа махталбытын тиэрдэбин. Баҕарабын өссө үрдүк таһаарыылаах үлэни, доруобуйаны, дьолу.
⠀
Раиса Григорьева,
СӨ үөрэҕириитин туйгуна,
СӨ физическай культуратын туйгуна.

Источник: https://mr-verhneviljujskij.sakha.gov.ru/