Yakutians.com

Новости Якутии

Гражданскай сэрии сабаҕаланар саҕаланыыта. Сүүс сыллааҕыта суруллубута…

Суруйда: Виталий СУР.

Алтынньы 24 күнүгэр Талбан биэриитигэр кыттыыны ыллым. Кэпсэтии Украинаҕа буола турар байыаннай операция тула барда. Мин онно Бастакы Аан дойду сэриитин түмүк түһүмэҕин холобур оҥорбутум – информация сэриитигэр сөрүү тутан. Ону суругунан ситэрэн биэриэхпин баҕарабын.

Как воевал Чехословацкий корпус в Гражданской войне в России - Русская  семерка

Бастакы аан дойду сэриитэ саҕаланаатын кытта Арассыыйаҕа олорор чехтэр уонна словактор (колонистар) ньиргиэрдээх ыҥырыы сурук суруйбуттара: “Нуучча аймахтарбытын кытта сарын сарынтан өйөнсөн уопсай өстөөҕү утары сэриилэһэ барабыт”, – диэн. Онон Чехословактар дружиналара тэриллибитэ. Ол саҕана билиҥҥи Чехия уонна Словакия Австрия-Венгрия империятыгар киирэллэрэ, онон бу дьон, биллэн турар, империя суулуннаҕына туспа судаарыстыба тэринэр ыралаахтара. Бу дружинаҕа Германия армиятыттан нууччаларга билиэн түбэспит чехтэр-словактар эмиэ баҕа өттүлэринэн киирэллэрэ. Үс сыл иһигэр дружина лаппа эбиллибит, онон 1917 с. балаҕан ыйыгар икки дивизияттан, саппаас биригээдэттэн турар Чехословактар корпустарыгар кубулуйбут.

Быһата, хабырына-хабырына сэриилэһэ сылдьыбыттар.

Билэргит курдук, Арассыыйа Антантаҕа киирэрэ, оттон Францияҕа Чехия “куота сылдьар бырабыыталыстыбата” – “Чехия национальнай кэмитиэтэ” хорҕойон сытара, онон дружина, төһө да Нуучча армиятыгар, нуучча генералларын хамаандаларынан сэриилэстэр, аатыгар Францияҕа бас бэринэр эбит.  

Олунньутааҕы буржуазнай өрөбөлүүссүйэ кэнниттэн легионердар Быстах бырабыыталыстыбаны өйөөбүттэрэ. Тоҕо диэтэххэ, Быстах бырабыыталыстыба “бүтэһиктээх кыайыыга тиийэ сэриигэ” ыҥырара. Оттон социал-дэмэкирээттэр, олор истэригэр ордук турунан бассабыыктар, “сэриилэһэн бүтүөххэ, дьиэлиэххэ” диэн атыыр аҕытаассыйаны ыыталлара. Биллэрин курдук, бассабыыктар аҕытаассыйалара (информационнай       сэрии) кыайбыта, армия түҥ-таҥ барбыта, хамандыыр бирикээһин толорор оннугар “саллааттар-мотуруостар сэбиэттэрин мунньаҕын” ыҥыраллара, үксүгэр бирикээһи “чыхаал!” диэн баран хамандыырдарын ытан кэбиһэллэрэ. Хара баһаам киһи саатын сүкпүтүнэн “өтөҕүн быспыта”, оттон саалаах киһи саата суохха хаһан баҕарар тойон буоларын быһыытынан, ханарытан эттэххэ, хара баһаам улахан да, кыра да хаһаайыстыба халанар эбит.

Өктөөп өрөбөлүүссүйэтин кэнниттэн тиһэҕэр диэри сэриилэһэр баҕалаах тыһыынчанан чех саллааттара бассабыыктары кытта атааннаспаталлар даҕаны, таах, таһаҕас кэриэтэ буолан сыппыттар. Үгүс кэпсэтии кэнниттэн Францияҕа бараллара быһаарыллыбыт. Муоранан быһа барар кыаллыбат диэн буолбут – онно немец подводнай лодкалара аҥаардастыы айбардыыллара үһү. Онон Владивостокка диэри тимир суолунан, салгыы уунан бараллара быһаарыллыбыт.

Барыта бэрт буолуоҕун, 1918 с. ыам ыйын 25 күнүгэр тас дьыалалар наркомнара Лев Троцкай бирикээһэ тахсар: чех саллааттарыттан сааларын былдьыырга, өрөлөспүтү өлөрөргө!

Чехтэр маны, биллэн турар, биһигини “билиэннэйдэри атастаһыы” бэрээдэгинэн Германияҕа биэрээри оҥоһуннулар диэн сыаналаабыттара уонна историяҕа “Үрүҥ чехтэр бууннара” диэнинэн биллэр сэбилэниилээх утарсыыны оҥорбуттара. Ол эрэ буолуо дуо, аахсар буоллахха, аньыылара-харалара баһаам буоллаҕа.

Мантан ыла Арассыыйаҕа гражданскай сэрии саҕаламмыта. Омуктар омуктары кытта кыдыйсыбыттара, угус араас баандалар, сэбилэниилээх этэрээттэр суксуруспуттара. Болдьообут курдук адмирал Колчак хантан күөрэс гыммытай? Америка Холбоһуктаах штаттарыттан. Ол иннинэ Лев Троцкай халыҥ хамаандалаах хантан кэлбитэй? Америка Холбоһуктаах штаттарыттан. Колчагы бассабыыктарга туттарбыт “белочехтары” ханнык хараабыл илдьэ барбытай?  «Хеффрон» (USAT Heffron) диэн американскай байыаннай хараабыл.

Таарыйа Арассыыйа империятын кыһыл көмүс саппааһын кып гыннаран барбыттара. Сорҕотун дуу, барытын дуу, суолтата суох.

Сүрүнэ – мантан инньэ дойдуну хаанынан уһуннарбыт гражданскай сэрии саҕаламмыта.

Белый террор Добровольческой армии на Северном Кавказе - Илья Ратьковский -  ИА REGNUM

Бу силиһэ-мутуга информационнай сэриигэ сытар. Бүгүҥҥү либэрээллэр оччотооҕу бассабыыктар оруолларын толороллор: “Сэриини тохтотуохха!”; “Туһата суох сэрии”; “Биһиги сэриибит буолбутах – олигархтар (Путин, нууччалар) сэриилэрэ.

Оччотооҕу “дэмэкирээтийэ” армияҕа күүскэ өтөн киирбитэ: барытын хамандыырдар буолбатах, саллааттар-мотуруостар сэбиэттэрэ куоластааһын түмүгэр быһаарыахтаах диэн.

Бүгүҥҥү “аҕытаассыйа” оччотооҕу буолуо, дуо, тыһыынчанан төгүл көдьүүстээх буоллаҕа. Сотору армияны “дьахталлар сэбиэттэрэ” дьаһайыахтаах диэн турдахтарына да киһи соһуйбат.

Быһыы-майгы уһаан-кэҥээн бардаҕына, биллэн турар, дьон санаата алдьанара саарбахтаммат. Ол аайы сэриини тохтотор, саллааттары дьиэлэригэр тарҕатар туһунан туруорсуу күүһүрэн иһиэҕэ.

Арай оннук буоллун?

Бастакы аан дойду сэриитигэр Арассыыйа хотторор кыаҕа суох этэ. Барыта дойду иһигэр куорҕаллыыр үлэттэн тахсыбыта.

Арай бүгүн “уопсастыбаннас туруорсуутунан” Украинаны кытта эйэлэһии буоллун? Ол хайдах уонна кимнээх услуобуйаларыгар барара суолтата суох.

Сынаарыйа сүүс сыллааҕыта суруллубута.

“Тиһэҕэр диэри” сэриилэһэр баҕалаах усулуобунай “белочехтар” син баар буолуохтара. Холобур, Рамзан Кадыров этэрээттэрэ – Чечня сэриитин саҕана “чехтэр” диэн кимнээҕи ааттыыллар этэй? Хайаан даҕаны ким эрэ “чеченнэр сэптэрин-сэбиргэллэрин былдьыахха” диэн бирикээс таһаарыаҕар саарбахтаабаппын.

Оннук араллаан тахсыа кэрэх, саҕахха “чехтэр национальнай кэмитиэттэрэ” күөрэс гыныа. Холобур, Турцияттан. Эрдоган кырдьаҕас Украина араллааныгар турунан-тууһугуран кыттыһан эрэр. Икки өттүгэр үлэлиир.

Кавказтар, татаардар, башкирдар уонна да атын… түүрдэр буолбатах, “ислам буойуттара”! Омоллоон олоҕо, дьэргэстэй ыһыаҕа. Араллааны күөртүүргэ арҕааттан харчы бөҕө харыыта суох киирэр. Быһата, олорбуппут сыччах.

Архивы информационная война против России · Родина на Неве

“Алдьархайтан ас таһаарынар” сатабыллаахтар акыйаан уҥуор олороллор. Бу сырыыга Арассыыйа хаанынан устуутун толору туһаныахтара.

Бу тыһыынчаттан биир сынаарый. Баара-суоҕа. Баҕар буолуо, баҕар буолуо суоҕа.

Бассаапка “Сур аҕыс миллиард киһиттэн сэттэтин өлөрүөхтэрэ” диэбит диэн, бадаҕа, күлэн суруйбуттар.

“Золотой миллиард” түөрүйэтинэн бу Орто дойду баайын-дуолун (ресурсатын) биир миллиард эрэ киһи туһаныахтаах диэн” – диэбитим. Атыттар бары “цивилизация тас өттүгэр” быраҕыллыахтаахтар. Ол өлөргө тэҥнээх. Өлөрөрү-эһэри лаппа сатаабыт дьон, ону саарбахтыа суохха баара.

Ол “миллиард” иһигэр сахалары ылыахтара дии санаабаппын. Арссыыйаҕа 20 мөлүйүөн киһи олоруохтаах диэн ким эттэ этэй? Маргарет Тэтчер.

Чугуйар суол суох. Уоттаах кыргыһыыга сылдьар уонна сэриилэһэ бараары сылдьар уолаттарбытыгар түөн да саҕа саарбахтыыр санааны соҥнуо суохтаахпыт.     

“Сахалары Кыһыл кинигэҕэ киллэриэхтээхтэр” диэн куолу баар. Кыһыл кинигэҕэ тугу киллэрэллэрий? Кыылы-сүөлү, оту-маһы. Оччотугар Хабаровскай пордугар саха уолаттара сөмөлүөккэ киирээри туралларын биир киһи: “Бараны!” – диэбитин кытта сөбүлэһэр буолан тахсабыт. Кыһыл кинигэҕэ чубуку (горный баран) баарын билэбин.

Онон сэрэниэххэ баара. Тылынан өлөрөллөр, сүрү тоһуталлар. Сахаҕа: “тыл барда, ох барда” диэн өс хоһооно баар. Оттон сүрэ тостубатах хоодуоттан буулдьа куттанар.  

Поделиться
%d такие блоггеры, как: