Елена Волкова: Үлэ министиэристибэтэ Бүлүү улууһугар социальнай киин тутуутугар үлэлэһиэҕэ

Олунньу 2 күнүгэр  социальнай сайдыы уонна үлэ миниистирэ Елена Волкова Бүлүү улууһугар кэлэн үлэлээн барда. Кини улууска үлэтин Сосновкаттан саҕалаата.

Миниистир Сосновкаҕа тутулла турар спальнай корпус тутуутун хаамыытын көрдө, ол кэннэ  ыарыһахтар олорор интернаттарыгар сылдьан, үлэ хаамыытын ымпыктаан-чымпыктаан билистэ. Миниистири кытта кэлбит быраас Атласова В.Н. ыарыһахтары эмтээһини, ыарыһахтар туруктарын көрдө-иһиттэ, медперсоналга элбэх сыаналаах сүбэни оҥордо.

🔹 Салгыы Елена Волкова Бүлүү куорат уонна  Бүлүү улууһун дьаһалталарыгар сылдьан баһылыктары кытта көрүстэ.

Бүлүү улууһун баһылыгын Сергей Винокуровтын  көрсүһүүгэ Елена Александровна министиэристибэ аннынан үлэлиир социальнай тэрилтэлэр үлэлэригэр киирбит уларыйыылары кэпсээтэ, социальнай тэрилтэлэр хаарбах туруктаах мас дьиэлэргэ үлэлииллэринэн билиҥҥи федеральнай ирдэбиллэргэ хоруйдаспаттарынан, баһаарынай быраабылаларга сөп түбэспэттэринэн улууска социальнай-реабилитационнай өҥөлөрү оҥорор биир улахан эбийиэги тутар боппуруоһу сөргүтэргэ санаатын эттэ.

Сергей Николаевич бу боппуруос элбэх дьон кыһалҕатын таарыйарынан, федеральнай сокуон ирдэбиллэригэр эппиэттиир, элбэх үлэ миэстэтин хааччыйар Социальнай өҥөлөрү оҥорор киини туттарыыга үлэлэһэрин, АЛРОСА дивиденэ чуолкайдаммытынан эбийиэк бырайыагар улуус 12 мөл. солк. көрөрдүү былаанныырын эттэ. Министиэристибэ өттүттэн тутуу ханна ыытыллара сөпкө быһаарыллыахтаах.

 Салгыы улуус дьаһалтата уонна Үлэ министиэристибэтэ  бииргэ үлэлииргэ сөбүлэһии туһэрсэргэ сүбэлэстилэр.

Миниистир улуустааҕы социальнай-территориальнай управление  нэһилиэнньэҕэ көрүллэр босуобуйалары кэмигэр сөпкө биэрэрин, нэһилиэнньэҕэ өҥөнү оҥорор тэрилтэлэр былааннаах үлэни сөпкө ыыталларын  чорботон бэлиэтээтэ.

Андрей Яковлев-ЧУОС