Yakutians.com

Новости Якутии

Ди Каприо үлэтэ Голливуд чугаһыгар да элбэх…

Ким эрэ Ди Каприо артыыска Саха сирин ойуур уота сиэн эрэр, көмөлөс диэн үҥсүбүт дииллэр. Бука, бэйэбит былаастарбыт кыамматтар, кыайдаххына эн кыайыаҥ диэтэҕэ буолуо. Анарааҥы киһи көмөлөһүөх буолбутун, Арассыыйа салалтата: “Махтал буоллун, ол эрэн “бэйэбит бэргэһэлээхпит” – диэн буолбут.

Леонардо ДиКаприо против пожаров в Якутии. Актер готов помочь, власти  региона просят не вмешиваться - YouTube

Саамай сөп. Ханнык да судаарыстыба бэйэтин ис дьыалаларыгар орооһууну утарар баҕайыта. Ди Каприо да буоллунууй, доҕор!

“Ойуур – сир ийэ тыынар тыҥата, онон Арассыыйа эрэ дьыалата буолбатах” – диэххит.

Оттон, холобур, Амазонка өрүс тардыытыгар 2020 сыллаахха 11 088 км2 ойуур кэрдиллибитэ биллэр. Ол эбэтэр, 1,1 мөл. гектар. Аҥаардас кэрдиигэ! Билэргит курдук, Амазония ойуурун үгүс өттө (520 мөл. га) Бразилияҕа тиксэр, ол аата онно үксүн АХШ хапытаала хамсыыр, АХШ хампаанньалара байаллар. Итини таһынан онно ойуур баһаара суох үһү дуо? Үгэс курдук, ол дойдуга ойуур тохсунньуттан саҕалаан умайан барар. Ортотунан 80 тыһыынча ойуур уота турар.

Манна ким кыһаллыахтааҕый?

Быһата, Ди Каприо кыһаллыан сөп сирэ аҕыйаҕа суох – Амазония Голливудтан олус ырааҕа суох.

Экологизм – бу идеология, ол эбэтэр, бэлиитикэ. “Политическай доктрина” быһыытынан киирбит быһыы-майгы. Биллэн турар, АХШ туһатыгар. Санаан көрүҥ, аан дойдуну аймаан туран сайдыылаах дойдуларга барыларыгар “Киото боротокуолун” ылларбыттара уонна бэйэлэрэ ратификациялаабатахтара. Акаарылары албыннаан илии баттаабыта буолбуттара, быһата. Бэлиитикэ! Атын дойдулар промышленностарын “туормастыыр” албас. Олор собуоттарын-фабрикаларын үлэлэтэр туһугар квота атыылаһыахтаахтар, оттон АХШ онно “силлиэн да баҕарыа суохтаах”. Бырастыы гыныҥ, “бизнес аата бизнес”, ону бэлиитикэ “соһор”, байыаннай базалар “крышалыыллар”.

Биһиги дьоммут, хата, Грета Тумберг кыысчааҥҥа үҥсүбэтэхтэр. Арассыыйа былаастара сэтиэнэх оту харыһыйаллара, сааскы өртөөһүнү боболлоро бэрт – кинилиин биир куомуннаахтар быһыылаах. Ол курдук, Грета Тумберг кытайдар аһыыр “палочкаларыгар” бамбугу бүтэрэн эрэллэр – тохтотуохха диэн туруорсубут сурахтааҕа. Онуоха кытайдар: “Иди, кури бамбук” – диэбиттэр, биллэн турар. Оту-маһы араарбат эколог диэннэр – бамбук мастыйбыт от буоллаҕа.

Своим скандальным выступлением Грета Тунберг настроила против себя весь  Китай - Мой город

Интернеккэ дойдуларыгар (судаарыстыбаларыгар) үҥсэргиир дьон туһунан тыл-өс арааһа элбэх. Олортон саамай сымнаҕаһын талан кэпсээтэххэ маннык.

Арассыыйаҕа Великобританияттан кэлэ сылдьар ыалдьыттар тустарынан. Саҥа дойдуну билэ-көрө сатыыллара баһаам буоллаҕа, ол иһигэр уулуссаҕа хаама сылдьар дьонтон ыйыталаһа сатыыллар эбит да, ким даҕаны аһыллан кэпсээбэт. Ыалдьыттар уопсайынан бэркэ сөбүлээн сылдьыбыттар, туохтааҕар да ордук кыргыттар кыраһыабайдарын бэлиэтээбиттэр. Ол сырыттахтарына биир эдэр киһи ойон кэлбит, английскай тыл учууталабын диэбит уонна биэс мүнүүтэ иһигэр дойдута куһаҕанын барытын хостообут: суолтан-иистэн, хамнастан саҕалаан, былаас куһаҕанын, оннугун-манныгын туһунан.

Англичаннар харахтара төгүрүйэн хаалбыт. Бэркиһээн тэпсэҥнэһэ турбуттар. Барбытын кэнниттэн “муҥнаах, дьоло суох киһи быһыылаах” – диэн түмүк оҥорбуттар. Бадаҕа, Ми-6 үспүйүөннэрэ буолбатах, көннөрү дьон эбиттэр.

Кинилэр санааларыгар, дойдута куһаҕанын туһунан омук дьонугар кэпсээһин, үҥсэргээһин, суланыы-кэлэнии туох да сиэргэ баппат быһыы эбит. Ханнык баҕарар дойдуга кыһалҕа кэмэ суох элбэх, ол эрэн, ону барытын иностранецтарга “кутан биэрии” боростуой англичанин санаатыгар – bad form. Плохой тон. Бу киһилии быһыы.

Дьиҥэ, саха омукка да оннук. Ыалга киирбитиҥ кыыстара дуу, уоллара дуу ийэтин-аҕатын куһаҕаннарын “хааһахтан хостоон” бардаҕына ыалдьыт бэйэҥ саатыаҥ – сирдээн тимириэххин сир кытаанах, халлааннаан көтүөххүн ханныҥ сааҕа ыарахан буолуоҕа.

Баары баарынан – СУР.

Поделиться
%d такие блоггеры, как: