Аскалон Павлов суруга. Эр киһи көмүскэс буолар аналлаах

Социальнай ситимнэргэ саха биир чулуу уола, биллиилээх ырыаһыт Аскалон Павлов аһаҕас суруга тарҕанна. Кини: “Мин бу суругу албыннаһан дуу, тилэх салаһан дуу суруйбатым, үйэбэр тобуктаан тоҥхороннооботох, сөһүргэстээн көрдөспөтөх, сирэй салаабатах киһибин. Тугу саныырбын, испэр туох баарын, тугу анаарарбын суруйдум. Өйдүөххүт диэн эрэнэбин” – диэбит.

Кырдьыга да, саха норуота бэйэтинэн талбыт Аҕа баһылыкпытын араастаан үөҕэрбит, ону ааһан кырыырбыт-таныйарбыт бөрүкүтэ суох быһыы.

Сахаҕа маннык өйдөбүл баар: киһи тугу барытын бэйэтинэн охсор.

Ким да билбэтинэн уоруон сөптөөх эрээри, куттаһа баарына уорбат муҥнаах киһини барытын уоруйахха күтүрүүр – бэйэтинэн охсор. Дьиҥэ баара куттас, мөлтөһүөр киһи дьону барытын куттаһынан, “мөлтөх киһинэн” ааҕар – бэйэтинэн охсор.

Кистэлэҥ ньылаҥса (кини ньылаҥныырыгар ким даҕаны наадыйбат дьоно эмиэ баар буолаллар) барыларын “эмэһэ салааччыттан” атыннык ааттаабат. Бэйэтинэн охсор.

“Биллэн турар, уораллара чуолкай буоллаҕа” – диэн буолар. Бу – сүрүн дакаастабыл. “Ээ, полициялар бары атыыланан бүппүт дьоннор” – диэн буолар. Кини киһи билбэтэҕинэн ким билиэй!

Аныгы үйэҕэ интернет, социальнай ситимнэр тарҕаныахтарыттан ыла “кыра киһи” күнэ таҕыста, күөнэҕэ көптө. Һаай-эбэтээ, кини даҕаны “трибуналанар” күннээх эбит! Тугу барытын, кими барытын “хоруо курдук” тэпсэр, хаардыы хаамар. Бэйэтиттэн бэйэтэ астынар – олус да өйдөөҕү эттим, дьэ, кэһэттим диэн. Аан дойду билиммит улуу дьонун, генийдары бэйэтин ычатыгар таҥнары тардан “тэҥнэһэр”: “Ээ, кини даҕаны саахтыыр этэ” – диэбиттии.

Анал идэлээхтэр маннык дьону “нарциссизмҥа” оҕустарбыт дьон кэккэтигэр киллэрэллэр эбит. Үгүстэрэ улар саастаах оҕолор, “маама революционердара”, “дьыбаан байыастара”. Ол эрээри балар кэккэлэригэр былаастан “өлбүт-сүппүт”, кини бэйэлээх ситэ сыаналамматах, ардыгар чунуобунньук кэккэтиттэн “муустаах ураҕаһынан” үүрүллүбүт дьон аҕыйаҕа суох.

Барыта “кэтэх өй” (подсознание) таһымынан. “Мин оннук буолбатахпын” – диэн мэлдьэһиэҥ иннинэ толкуйданан көр.

Уйулҕаны чинчийээччилэр бу халыҥ аармыйаны информационнай сэрии “пушечнай мээсэтэ” диэн ааттыыллар. Бэлэм “хос сыҥаахтар”. Ол эбэтэр, “информационнай сэрии” дьиҥнээх байыастара, дьиҥэ, харчыга үлэлиир буоллахтарына, “пушечнай мээсэ” буор босхо хообургуур. Бэрт буолбатах дуо?

Барыта “үчүгэйи баҕаран” диэхтэрэ. Дойдуларын таптыыллара бэрдиттэн, былааһы, судаарыстыбаны абааһы көрөллөрө бэрдиттэн үһү.

Бу сымыйа дойҕох. Дойду уонна судаарыстыба хайдах да арахсыбат өйдөбүллэр. Дойдуҥ бүгүҥҥү сирэйэ – судаарыстыба. Ону силлээн-хаахтаан бэрди оҥорбоккун. Былаас тугуй? Бу бар дьонуҥ талбыт былаастара. “Народ имеет ту власть, которую заслуживает” – диэн баар. Саамай сөптөөх этии. Ким билэрий, хайдах былааһын? Либэрээллэр “куһаҕан былаас” диэхтэрэ эрээри, 90-с сылларга кинилэр былаастарын анныгар олорбуппут – төһө бэрт этэй?

Дьэ, киэн туттуу бөҕөтө: сахалар Конституцияҕа көннөрүүлэри утардыбыт, дьэ, сүрдээх дьоммут! Путины “посылайдаатыбыт”, Айсен Николаевы үүрдэрэр буоллубут дэһэр дьон бааллара…

Субу аҕыйах хонуктааҕыта ЕСЧП (Европа киһи быраабын көмүскүүр суута) Арассыыйа эр киһи эр киһини, дьахтар дьахтары кытта ыал буоларын көҥүллүөхтээх диэн уураахтаата. Дьэ, Конституцияҕа көннөрүүлэри киллэрбэтэхпит, Арассыыйа сокуоннара норуоттар икки ардыларынааҕы нуормалартан (дьиҥэ туох да “норуоттар икки ардыларынааҕы суут-сокуон” диэн суох, дуогабардарынан, сөбүлэһиилэринэн сыһыаннаһыы эрэ баар) үрдүкү турар, дьиэ кэргэн диэн дьахтар уонна эр киһи холбоһуута диэн нуормалары ылымматахпыт буоллар, бука, бу уурааҕы толорорго тиийиэ этибит. Дьэ, сахалар үөрүө этибит дуо? Мин өйдүүрбүнэн, сахалар барахсаттар хайы-сах кыраныысса таһыгар тахсан оннук “ыал” буолбут уолаттардаахпыт, онон Арассыыйа омуктарын ортотугар, бырыһыаныгар таһаардахха, “инники күөҥҥэ” сылдьабыт быһыылаах.

Сорох дьон судаарыстыба “половой боппуруоска” орооһуо суохтаах диэн куолулуур. Ол сөп, судаарыстыба Арассыыйаҕа да онно орооспот. Ол эрэн, дьиэ кэргэн институтун, барбах, “половой боппуруоска” эрэ сыһыарар төһө сөптөөҕүй?

Сахалар аҕыйах ахсааннаах омукпут. Онон дьиэ кэргэн боппуруоһа Арассыыйа Конституциятыгар киирбитэ чуолаан биһиэхэ, сахаларга, тыын суолталаах диэтэххэ омун буолбатах.

Кириитикэ баар буолуохтаах. Дьоһуннаах кириитикэ диэн туспа – “конструктивнай” диэн ааттыыллар. Айарга-тутарга туһуламмыт кириитикэ. Оннугу этэр-тыынар дьон аҕыйаҕа суохтар. Бу суруйуу кинилэргэ сыһыана суох.  

Дьиҥнээх үлэһит, ис сүрэхтэриттэн судаарыстыба, дьон-сэргэ туһугар үлэлиир дьон мээнэ суруйбаттар, кими да үөхсүбэттэр. Оннук быһыыны үрдүнэн сылдьаллар. Бу – улахан дьон.

Аскалон Павлов тыллара – дьиҥнээх эр киһи тыллара. Эр киһи көмүскэс буолар аналлаах. Дьиҥэ баара, дьон-сэргэ иннигэр саамай көсмүскэлэ суох кимнээҕий? Былаас дьоно. Кими үөҕэр саамай куттала суоҕуй? Былаас дьонун. Төһө баҕарар үөҕүөххэ, ыыстыахха сөп. “Тоҕо публичнай киһи буолбутай, кэһэйдин” – дэһэбит.

Онон мин Аскалон Павлов этиитигэр кыттыһабын:

Биир хааннаахтарым!

Уолбутун, Ил Дархаммытын иилии эргийэн харыстыах, хаххалыах, өйүөх, өйдүөх, кини тула түмсүөх, ыраахтан да буоллар үтүөнү анаарыах, кэскиллээҕи ырытыах, кэнэҕэскибитин көрүнүөх, биир санааҕа туруох!

Иннибит хоту!!!

Суҥхарда уонна сонурҕаата – СУР.