Амма улууһугар бааһыналары сөргүтүү, туһаҕа таһаарыы ыытыллар

Бу күннэргэ урбаанньыт, СӨ норуотун дьокутаата Руслан Федотов «Амма» АУо кытта сөбүлэһии түһэрсэн хаһаайыстыба Хойуу диэн учаастагар 352 га иэннээх сири оҥорторон, көрөн-харайан, түмүгэр төһө үүнүүнү ылыахха сөбүн көрдөрөр соруктаах үлэтин саҕалаата. Бу Хойуу сирэ 20 сылтан ордук кэмҥэ туһаныллыбакка турар. Урукку өттүгэр элбэх сылах от ыһылла сыльыбыта. Билигин талах саба үүнэн турар.

Дуогабар быһыытынан АО «Амма» улахан кыамталаах тиэхиникэлэрэ бу күннэргэ Хойууга сири хорутуу үлэтин саҕалаатылар. Мантан күһүн бааһыналарга хорутуу уонна диискэлээһин, күрүөлээһин үлэлэрэ барыахтара. Оччотугар эрэ сааскы ыһыы халтайга хаалбат, үлэ түмүктээх буолар. Инникитин бу оҥоһуллубут бааһыналарга элбэх сылаах от, бурдук уонна оҕуруот аһа олордуллуохтаах.

«Элбэх сылаах оту ыһыахпытын баҕарбыппыт ыраатта. Быһатын, бу учаастакка, аныгы тиэхиникэлэри үлэлэтэн, уу кутар систиэмэ тартаран, сиргэ саҥалыы сыһыаны олохтоон үлэлиэхпит. Кыра сиртэн бородууксуйаны ылан, барыстаах тахсары ситиһиэхтээхпит. Ол барыта ситэн-хотон үлэлээтэҕинэ, үлэ миэстэтэ тахсыаҕа, чэпчэки сыаналаах бородууксуйа баар буолуоҕа. Инникитин бу сир улууспутугар сүөһү аһылыгын стратегическай базата буолуон баҕарабын. Улууска сүөһү сиир хаачыстыбалаах ото уонна бурдуга баар буолуохтаах. Кэнники сылларга өрөспүүбүлүкэ үрдүнэн айылҕа содулуттан араас уустуктары, ыарахаттары көрсөр буоллубут. Онон кэмигэр күнү-дьылы кэтэспэккэ элбэх сыллаах оту ыһан, оттооһун төһө эрэ бырыһыанын толоруохха сөп. Урут Сэбиэскэй былаас саҕана ыһыллыбыт оттор билигин үүнүүнү биэриилэрэ мөлтөөн турар. Онон билигин бу үлэни саҥаттан саҕалыахха, сөргүтүтүөххэ наада. Өр сылаах оту ыһан баран 3 сыл устата күүтэҕин. Ол аата ыһыы кэннэ 3 сыл таах турар, сиэмэтин биэрбэт. Ол иһин дьон ночооттоох диэн бу хайысхаҕа ылсыбат», – диэн норуот дьокутаата Руслан Федотов санаатын үллэстэр.

Биллэн туран, бааһынаны сөргүтүү, ыһыы үлэтин ыытыы үгүс үлэни, сыраны, үбү-харчыны эрэйэр. «Билигин сиргэ саҥалыы, хаһаайынныы сыһыан наада. Ылан көрдөххө, нэһилиэк ахсын сирдэр бары хаһаайыннаахтар. Ол эрэн дьон-сэргэ сиригэр кыһаммат, сайыҥҥы өттүгэр оттуур эрэ. Онтон бу сиртэн элбэх оту ылар туһугар үлэ барыахтаах. Сир оҥоруутун боппуруоһун сири бас билээччи уонна улуус дьаһалтата күүскэ ыытыахтаах. Сири бас билээччи эбэтэр арендаҕа туһанааччы сирин сөптөөхтүк туһанарга анал программалаах буолуохтаах. Холобур, биир алаас, сыһыы хас да бас билээччилээх. Бу дьон бары сөбүлэһэн баран ууну түһэрэргэ эбэтэр киллэрэргэ, нүөлсүтэргэ бары биир программалаах буолуохтаахтар. Тус-туспа сылдыа суохтаахтар. Онон сири туһаныыга бас билээччилэр уонна олохтоох дьаһалта анал былааннаах буолуохтаах. Онтон бу Амма улууһугар бааһыналары сөргүтүү үлэтэ саҕаламмыта хайҕаллах дыала. Инникитин дьон-сэргэ көрөн, сиргэ-уокка сыһыана уларытанн, сири сөпкө туһанарга ылсарыгар холобур буолуоҕа», – диэн тыа хаһаайыстыбатын миниистирэ Александр Атласов бэлиэтээтэ.