24 уонна 49 кыбартыыралаах дьиэлэр быйыл үлэҕэ киириэхтэрэ

“Саахалланар туруктаах уонна эргэ дьиэлэртэн көһөрүү” судаарыстыбаннай бырагырааманан Ньурба куоракка элбэх кыбартыыралаах дьиэ тутуутун туһунан эрдэ суруйан турабыт. Бу тосхолунан элбэх кыбартыыралаах дьиэлэр үлэҕэ киирэн, элбэх дьон табыгастаах уонна толору хааччыллыылаах олорор дьиэнэн хааччылыннылар. Бу бырагыраама үлэтин саҕалыаҕыттан Ньурбаҕа барыта 400-тэн тахса ыал саҥа дьиэҕэ киирэн олорор. Биирдии кыбартыыра сыаната 2,5 мөл. солк. саҕалаан, 4 хостооххо түбэспиттэр 7,5 мөл. солк. тиийэ суумалаах кыбартыыраны судаарыстыбаттан босхо ылбыттара. Бу биһиги судаарыстыбабыт дьонун туһугар кыһамньытын бэлиэтэ буолар.

“Саахалланар туруктаах уонна эргэ дьиэлэртэн көһөрүү” тосхол салгыы үбүлэнэн, үлэ ыытылла турар. Ааспыт нэдиэлэ бээтинсэтигэр Ньурба к. 2 эбийиэгинэн сылдьан үлэ хаамыытын билистим.

Иллэрээ сыл ахсынньы ыйыттан Ньурба к. Кузаков уулуссатыгар “Виком” ХЭТ 24 кыбартыыралаах дьиэни тута сылдьар. Дьиэ уопсай иэнэ – 800-чэ кв. м, тутуу сыаната – 80 мөл. солк. кэриҥэ. Дьиэ былырыын бүтэн үлэҕэ киириэхтээҕин пандемияттан сылтаан бытаарыы тахсыбыта.

“Виком” ХЭТ прораба Иван Егорович Кондратьев кэпсииринэн, билигин тутуутугар истэри-тастары 25 киһи үлэлии сылдьар. Ис өттүгэр штукатурката бүппүт, түннүктэр туруоруллубуттар. Кафель плитатын уура сылдьаллар, электриката бүтэн эрэр. Маны сэргэ таһынааіы благоустройствота бүтэн эрэр. Таһынааҕы ититии ситимин турбатын олохторун оҥоро сылдьаллар. Ититии ситимин матырыйаала кэллэ даҕаны, ону тардан таҥан барыахтаахтар. 24 кыбартыыралаах дьиэни сэтинньи бүтүүтэ бүтэрэргэ былаанныыллар.

Вертолетка микро-оройуонугар Комсомольскай уулуссаҕа 5 этээстээх, 49 кыбартыыралаах дьиэ сыбаайалара былырыын түһэриллибиттэрэ. Бу “Саахалланар туруктаах уонна эргэ дьиэлэртэн көһөрүү” тосхолунан тутулла турар дьиэлэртэн саамай улаханнара. Сакаасчытынан – “СӨ Дьиэ тутуутун дириэксийэтэ”, бэдэрээтчитинэн “Региональнай сайдыы” ХЭТ буолаллар. Хантараак быһыытынан бу дьиэ эһиил 4-с кыбаарталга үлэҕэ киллэриэхтээҕэ. Ону тутуу үлэтигэр улууска таһаарыылаахтык үлэлии сылдьар биир саамай кыахтаах тэрилтэ быйыл киллэрэргэ соруктанан, күүскэ дьулуйан үлэлии сылдьар. Бу тэрилтэ улууска 5-с таас тутуута, итини таһынан 2 мас дьиэни тутан киллэрбиттэрэ.

“Региональнай сайдыы” ХЭТ кылаабынай инженерэ Артем Тимофеев иһитиннэрэринэн, манна 37 киһи үлэлии сылдьар. Ол иһигэр күннээх Таджикистан, Узбекистан дьонноро уонна олохтоох сахалар бааллар.

“Сөптөөх үлэһиттэринэн хааччыллан үлэлии сылдьабыт, харчы кэмигэр кэлэ турар, онон үлэҕэ харгыс суох, – диир Артем Владимирович. – Үлэ барыта биир тэҥинэн барар. Ол иһигэр дьиэ тас эпсиэйэ, утеплениета уонна тутатына шпаклевката, бүгүҥҥүттэн кырааскатын саҕалыахтаахпыт. Сарайа оҥоһуллар, обрешетката сарсын бүтэр, өйүүн черепицаны уурабыт. Түннүк олордуллан бүппүтэ, балконнай ограждение оҥоһуллубута. Витражпытын аҕалан иһэллэр, сарсыҥҥыттан олордон барыахпыт. Дьиэҕэ ититиитин киириитэ (ввод) бүппүтэ, кыбартыыраларынан иһинээҕи систиэмэтин оҥоро сылдьабыт. Онтон сантехникатын саҕалыахтаахпыт. Дьиэ территориятын тупсаран оҥоруута барар. Бетон автостоянка (24х12м) уонна маны эргийэ суол, итиэннэ оҕо былаһаакката оҥоһуллуохтаах. 70 кубтаах септик оҥоһуллан бэлэм сытар.  Штукатурка аннынан электриката тардыллыбыта, поквартирнай щитоктар хомулла сылдьаллар.

Сэтинньи 20 к. уопсай тутуу-отделка үлэлэрин бүтэрэргэ былаанныыбыт. Онтон 20-чэ күн регистрация процедурата ыытыллар. Ол эбэтэр дьиэни тэрилтэбит аатыгар регистрациялыыбыт, онтон улууска биэрэбит, салгыы улуус дьоҥҥо биэрэр”.

Суруйда: Геннадий АНТОНОВ.

Сигэ: https://mr-njurbinskij.sakha.gov.ru/