Үөһээ бүлүүлэр – Олоҥхо ыһыаҕар!

Быйыл өрөспүүбүлүкэтээҕи XIV Олоҥхо ыһыаҕа өҥ буордаах Өлүөхүмэ улууһугар киэҥ далааһыннаахтык ыытыллыбытын бары күөх экран нөҥүө астына көрдүбүт, иһиттибит.⠀

Биһиги улуустан Олоҥхо ыhыаҕар кыттыыны ыла барбыт бөлөх икки күннээх киирсии кэнниттэн кэккэ ситиһиилэммиттэрин уруйдуу-айхаллыы үллэстэбит.
Ол курдук, дэгэрэҥ ырыа күрэҕэр Николай Борисов (Ороhу) – 3 миэстэ, тойукка аҕам саастаахтарга Трофим Миронов – 2 миэстэ, Валентина Семенова – 3 миэстэ, Сахаайта Мойтохонова – 1 миэстэ.
Ыччаттарга Марианна Хобусарова – 3 миэстэ, оhуохайга ыччаттарга – Василий Игнатьев (Оҥхой) – 1 миэстэ, Сахаайта Мойтохонова – 2 миэстэ, Маҥаастан Егор Егоров – Добун сурук, Андрей Алексеев – “Тэтимнээх этээччи”, Марианна Хобусарова – “Удьуор утуму салҕааччы” анал аат иҥэрилиннэ. Ону  таhынан чабырҕахха бөлөҕүнэн толорууга ыччаттарбыт – “Удьуор утуму тутуһааччы”, Сахаайта Мойтохонова – “Төрүт үгэһи утумнааччы” анал ааттарынан наҕараадаланнылар.

⠀⠀Валентина Семенова, Марианна  Хобусарова фольклорга ситиhиилэрин иhин Ил Түмэн грамотатынан, кыhыл көмүс чаhыынан биһирэннилэр.
⠀⠀Талааннаах кэскиллээҕи саҕар, кэрэҕэ уһуйар, удьуор утумун тутуһар, угуйар дьоммутугар ситиһиилэринэн эҕэрдэ, махтал бастыҥа!
⠀⠀Олоҥхо Ыһыаҕын сабыллыытыгар улууспут салалтата эһиил, 2022 сылга, Саха АССР тэриллибитэ 100 сылыгар Олоҥхо ыһыаҕын Үөһээ Бүлүүбүт улууһугар ыытар туһунан бэлиэни – Ытык Дуоҕаны бар дьон иннигэр үөрүүлээх быһыыга-майгыга туппута ордук долгутуулаах, эппиэнистээх буолла.
⠀⠀Эһиилги сылга бу Улуу Ыһыаҕы бары  турунан, үрдүк таһымҥа ыытар туһугар, күүскэ ылсан үлэлиэҕиҥ-хамныаҕыҥ диэн биир дойдулаахтарбытын ыҥырабыт!

Сигэ: https://mr-verhneviljujskij.sakha.gov.ru/