Үөһээ Бүлүү: Саанан ытыыга «Эрэл» спортивнай комплекс арылынна

Балаҕан ыйын 25 күнүгэр улууспутугар биир ураты, бэлиэ күн буолла. Улууспут ытыктыыр мецената, спортинг күрэҕэр өрөспүүбүлүкэтээҕи чемпионатка иккитэ иккис, үстэ үһүс, 2013 сылга Омскай куоракка Арассыыйа кубогын этабыгар личнай зачекка бэһис миэстэлээх, Арассыыйа чемпионаттарыгар хамаанданан күрэххэ иккис, үһүс миэстэлээх, Арассыыйа кубогар иккис уонна үһүс миэстэлээх, 2012 сылга Хабаровскай кыраай чемпиона, 2014 сылга Челябинскай куорат чемпиона, 2015 сылга Дьокуускай куорат чемпиона, 2019 сылга Алтайскай кыраай чемпиона, Арассыыйа кубогын ахсыс этабыгар чемпион, улуус ытыктанар киһитэ Николай Николаевич Еттянов бэйэтин күүһүнэн оҥорбут, туттарбыт «Үөһээ Бүлүүтээҕи спортинг сайдыытын киинэ” автономнай, коммерческайа суох тэрилтэни үөрүүлээхтик арыйыы буолла.

Ытыктыыр меценаппыт Николай Еттянов идеятынан, улууспут Баһылыга Владимир Поскачин көҕүлээһининэн, спорт биир умсугутуулаах көрүҥэ сайдар кэскиллэннэ! Эдэр ыччаты, үүнэр көлүөнэни спортка угуйар, сыһыарар толору хааччыллыылаах, бары ирдэбилгэ эппиэттиир, түөрт компакт-спортиҥҥа норуоттар икки ардыларынааҕы былаһааккалардаах, кыһыҥҥы ытар дьиэлээх «Эрэл» стрельбище ааннара олохтоохторго тэлэччи аһылыннылар.
Бу дьоһун саҕалааһын ыччакка, ытыы спордун сэҥээрээччилэргэ кэтэһиилээх , үөрүүлээх түгэн.

Балаҕан ыйын 25-26 күннэригэр, стрельбище арыллыытын кытары дьүөрэлэһиннэрэн, улууспут Аҕа Баһылыгын Владимир Поскачин бирииһигэр икки күннээх өрөспүүбүлүкэтээҕи спортинг күрэҕэ ыытылынна.Өрөспүүбүлүкэ араас муннугуттан аат ааттаан күрэхтэһэ кэлбит спортсменнары «Эрэл» стрельбище арыллыытын долгутуулаах чааһыгар айылҕаттан айдарыылаах алгысчыт Трофим Миронов аал уоту оттон, алаадьынан күндүлээн, айах тутан, Үрдүк Айыылартан көрдөстө, инникитин үгүс спортсмен үүнэн таҕыстын диэн алҕаата, бу уустук кэмҥэ бар дьонун этэҥҥэ буолуҥ диэн кыа оту уматан буруолатан ыраастаата, санааларын, куттарын бөҕөргөттө.

Бу үөрүүлээх күҥҥэ СӨ стендовай ытыыга уонна спортиҥҥа национальнай федерациятын толорооччу дириэктэрэ Павел Карпов үөрүүтүн үллэһиннэ:
– Билиҥҥи кэмҥэ Саха Сирин ытааччылара Арассыыйаҕа эрэ буолбакка, Аан Дойду үрдүнэн инники күөҥҥэ сылдьаллар. Айаал Макаров, Аан дойду чемпиона, Николай Кобяков Европа чемпионатыгар бастакы миэстэни ылбыта, аҕыйах хонуктааҕыта Кипрга буолбут чемпионатка Айаал Макаров уон киһи иһигэр киирэн Саха норуотун үөрдэ сылдьар диэтэ. Мин Үөһээ Бүлүүгэ 2017 сыллаахха Манчаары оонньуутугар ох саанан ытыы федерациятыгар үлэлии сылдьан кэлэ сылдьыбытым. Онно саха ох саатынан ытыыга бастакы күрэх, бастакы сүрэхтэнии буолбута. Ол күрэххэ Үөһээ Бүлүү хамаандата олус ситиһиилээхтик кыттыбыта. Быйыл Горнайга ыытыллыбыт Манчаары оонньууларыгар эмиэ чаҕылхайдык ыппыттара. Онон Үөһээ Бүлүүлэр кыраҕы харахтаахтар диэн билэбин. Бу “Эрэл” стрельбище арыллан, кэлэр кэнчээри ыччаты саанан ытыы, спортинг көрүҥэр сайыннаран, Аан дойду таһымыгар тахсыахтара, аатырдыахтара диэн бигэтик эрэнэбин, – диэтэ.

РФ саанан ытыыга национальнай федерациятын, СӨ саанан ытыыга федерациятын ааттарыттан эҕэрдэ суругу туттарда уонна саҥа дьылга диэри икки тэриэлкэ быраҕар метательнай машинканы аҕалан туттарыахпыт диэн эрэннэрэбин диэтэ. Ону тэҥэ Николай Еттянов саанан ытыыга элбэхтик бииргэ алтыспыт доҕотторун, соҕуруу бииргэ күрэхтэспит табаарыстарын ааттарыттан бу саҥа арыллыбыт саанан ытыы спордун комплекса өссө сайдарыгар, үүнэригэр баҕаран туран, дьон сынньанарыгар сөптөөх бары усулуобуйа тэрилиннин диэн М-Видеоттан бытовой техника атыылаһарга 100000 солкуобайдаах сэртэпикээти бэлэх быһыытынан уунна, “Туймааданефть” салайааччыта, Үөһээ Бүлүүлэр күтүөппүт Степан Чепалов 200 литрэ бензин сэртэпикээтин туттарда.
Салгыы улууспут Аҕа Баһылыга Владимир Поскачин бирииһигэр өрөспүүбүлүкэтээҕи икки күннээх биирдиилээн уонна хамаанданан саанан ытыы күрэҕэ саҕаламмытынан ааҕан туран, «Эрэл» автономнай, коммерческайа суох тэрилтэ былааҕын бу киин тэрийээччитэ Дьулустаан Еттянов үөһэ өрө күөрэтэн таһаарда.Былаах ситиһиини, инникитин өссө элбэх күрэҕи туоһулуурдуу  үөрбүттүү тэлибирии турда.
Улуус баһылыга Владимир Поскачин эҕэрдэ тылын эттэ. ”Үлэлиир киһиэхэ- үлэ кыаллар. Николай Николаевич бэйэтин күүһүнэн, үбүнэн дьоһуннаах, улахан, тыа сиригэр олус үчүгэй стрельбище оҥорон таһаарда.Куорат стрельбищетыттан хаалсыбат. Кыһыҥҥы өттүгэр эмиэ саанан ытар дьиэлээх. Бу комплекска инникитин араас таһымнаах элбэх күрэхтэһии буолуон наада. Өрөспүүбүлүкэ, арассыыйа, Айаал Макаров курдук ытааччыларбыт кэлэр буоллахтарына, баҕар, аан дойду таһымнаах күрэхтэр буолуохтарын сөп. Онон инникитин манна онно сөптөөх инфраструктура, гостиница, тутуу, суол-иис тутуллуохтаах, оҥоһуллуохтаах. Дьон кэлэн күрэхтэһэригэр сөптөөх таһымнаах буолуохтаах. Эһиил биһиги улууска ыытыллар Олоҥхо ыһыаҕар бу спортивнай комплекска күрэхтэһии син-биир буолар. Улахан бириистэр туруохтара,- диэтэ.
Улуустааҕы физическэй культура уонна спорт управлениетын начаалынньыга Антон Малардыров эҕэрдэ тылын эттэ. «Николай Николаевич спортка сыһыанынан, бэриниитинэн олус сөхтөрдө. Спорт эйгэтигэр маннык дьоннор аҕыйахтар. Бэйэтин көҕүлээһининэн, сыратынан бу коплексы тэрийбитэ улахан хамсааһын, улуус, өрөспүүбүлүкэ спордун сайдыытыгар дьоһуннаах кылаат дии саныыбын, Николай Николаевичка сүгүрүйэбин», -диэтэ.
Уонна Николай Еттяновка СӨ физическэй культураҕа уонна спортка миниистирин илии баттааһыннаах, 1162 №-дээх «СӨ физическэй культураҕа уонна спортка бэтэрээнэ” диэн бочуоттаах бэлиэ дастабырыанньатын туттарда, анал бэлиэни түөскэ кэтэртэ.
Күрэҕи СӨ стендовай ытыыга уонна спортиҥҥа национальнай федерациятын толорооччу директора Павел Карпов арыйда, бары спортсменнарга сэрэхтээх буолуу инструктаһын билиһиннэрдэ.Дьэ, уонна икки күн аһаҕас турнир өрө күүрүүлээхтик, тэрээһиннээхтик ааста.

Тыҥааһыннаах күрэхтэһиигэ Саха сирин көмүскүү сылдьар топовай маастардар бааллара үгүскэ үөрэттэ. Бу саанан ытыыга спорт биир умсугутуулаах көрүҥүгэр кыттар дьон бары кыахтарын, сатабылларын, албастарын туһанан инники кирбиилэргэ таҕыстылар. Ол курдук, хамаанданан күрэххэ 1-кы миэстэни Үөһээ Бүлүү бастакы хамаандата, 2-с миэстэни Уус Алдан, 3-с миэстэни- Үөһээ Бүлүү иккис хамаандата ыллылар. Муҥутуур кыайыылаах иһин хамаанданан киирсиигэ 1-кы миэстэни- Уус-Алдан, 2-с миэстэни- Дьокуускай, 3-с миэстэни- эмиэ Дьокуускай хамаандалара үллэһиннилэр. Биирдиилээн киирсиигэ топовай маастардар А категориялаахтар икки ардыларынааҕы күрэххэ 1-кы миэстэни- Степан Чепалов, 2-с миэстэни- Игорь Егоров, 3-с миэстэни- Павел Карпов ыллылар. Кадеттар икки ардыларыгар 1-кы миэстэ – Уус Алдантан сылдьар В.Ю. Бурцев, 2-с миэстэ- Үөһээ Бүлүүттэн Уруйдаан Прокопьев, 3-с миэстэ- Сунтаартан Дьулустаан Давыдов буоллулар, В категриялаахтарга 1-кы миэстэҕэ Уус Алдантан Ариан Аммосов, 2-с миэстэҕэ Үөһээ Бүлүүттэн Алексей Евдокимов, 3-с миэстэҕэ Үөһээ Бүлүүттэн Николай Андреев тигистилэр. С категориялаахтарга 1-кы миэстэ- Үөһээ Бүлүүттэн Дьулустаан Еттянов, 2-с миэстэ- Андрей Петров, 3-с миэстэ- Уус Алдантан Олег Черкашин буоллулар. Бэтэрээннэргэ 1-кы миэстэни Үөһээ Бүлүүттэн Андрей Петров, иккис миэстэни Уус-Алдантан Николай Бурцев, 3-с миэстэни Уус Алдантан Петр Протопопов ыллылар. Супербэтэрээннэргэ 1-кы миэстэ- Николай Еттянов, 2-с миэстэ- Үөһээ Бүлүүттэн Константин Гаврильев, 3-с миэстэ Уус Алдантан Иван Неустроев буоллулар.
Суперфиналга Саха сирин бастыҥ, бэргэн ытааччылара киирэн күөн көрүстүлэр. Кинилэр истэригэр Ариан Аммосов, Степан Чепалов, Игорь Егоров, Алексей Евдокимов, Дьулустаан Еттянов бааллар. Бар дьонун иннигэр бэйэтин тулуурун, дьулуурун, айылҕаттан дьоҕурун, кыраҕы хараҕын көрдөрөн Дьулустаан Еттянов муҥутуур кыайыылааҕынан таҕыста.Улуус Баһылыгын бирииһин- убаһаны ылла. Супер бэтэрээннэргэ Николай Еттянов барыларын лаппа баһыйан, эмиэ бастаан, бар дьон билиниитин ылла.
Еттяновтар дьиэ кэргэттэрэ улууска маннык улахан культурнай, спортивнай сайдыыга бэйэлэрин  дьоһун кылааттарын киллэрбит бастакы дьонунан буолаллар. Дьиҥ-чахчы төрөөбүт дойдуларын эрэллээх патриоттара буолан бэйэлэрин күүстэринэн нэһилиэнньэ сайдыытыгар-үүнүүтүгэр маннык холобур буолар хамсааһыннары оҥороллор.Түгэнинэн туһанан, Еттяновтар дьиэ кэргэттэрэ өрүү бииргэ үлэлэһэ, өйөһө олорор тэрилтэлэргэ, бу тэрээһиҥҥэ спонсордаабыт урбаанньыттарга Евгений Корякиҥҥа, Валерий Федоровка, ” Сардаана” ХЭО, аэропорт тэрилтэтигэр, сал. Дмитрий Ивановка, Люция Спиридоноваҕа, Гюльнара Чылбыноваҕа, Сардана Григорьеваҕа, Петр Андреевка, Раиса Степановаҕа, “Инблавер” ХЭО  тэрилтэҕэ, “Үйэ” кафе салайааччытыгар Евдокия Баянаеваҕа , Татьяна Спиридоноваҕа, Алексей Федоровка, “Кэрэчээнэ” кафеҕа, улуустааҕы ОГПС тэрилтэтигэр, сал. В.Новиков, Үөһээ Бүлүүтээҕи газовай учаастакка, сал. Иван Захаров, улуустааҕы доруобуйаларынан хааччахтаах дьон уопсастыбатыгар, улуустааҕы дьахталлар Сэбиэттэригэр, култуура уонна духуобунас, физическэй култуура уонна спорт департаменыгар дириҥник махтаналларын биллэрэллэр.
Улууспут сайдыытыгар оҕотуттан улаханыгар диэри хас биирдиибит өйбүтүнэн-санаабытынан, кэрэҕэ, үрдүккэ дьулуһуубутунан, бэриниилээх тапталбытынан, улууспут аатын киэҥ эйгэҕэ ааттатарбытынан сэмэй кылааппыт киллэрсэбит. Ол биир чаҕылхай туоһутунан- бу саҥа арыллыбыт саанан ытыыга спортивнай комплекс арыллыыта буолар. Үйэлэрин тухары нэһилиэнньэ туһугар кыһаллар Еттяновтар дьиэ кэргэттэригэр барҕа махтал буоллун! Эһиги чаҕылхай холобургутун ыччат дьон бастыстын!

Автор: Валентина ФИЛИППОВА

Сигэ: https://mr-verhneviljujskij.sakha.gov.ru/