Yakutians.com

Новости Якутии

Ытык дьоммутун кэриэстээн

Үөһээ Бүлүү улууһун Маҥаас нэһилиэгэр 2020 сылга, ППМИ программатынан, Кыайыы 75 сылыгар аналлаах Ытык дьоммутун кэриэстээн, үлэ – тыыл бэтэрээннэригэр аналлаах үйэлээх, кэскиллээх сквер тутуутугар  1 мөлүйүөн 800 тыһыынчалаах граҥҥа конкурсу ааһан, Дьокуускай куораттан “Ректайм” ХЭУо үлэни ылсыбыта.   

Маҥааска - ытык дьоммутун  кэриэстээн.

Барыта аныгылыы тутууннан, нэһилиэк килбэйэр киинигэр, 1225 кв м иэннээх Кыайыы болуоссата дьэндэйэр… Бу манна бааллар,уоттаах сэрии утары харса суох кимэн киирсиигэ сураҕа суох сүппүттэр, атын сиргэ дууһаларын толук уурбут саллааттар, кыайыы көтөллөнөн кэлбит буойуттар,  сэрии ыар сылларыгар, эрэйи – муҥу көрбүт, хоргуйууну эттэринэн – хааннарынан билбит, оонньооботох оҕо саастара өйдөрүттэн – сүрэхтэриттэн умнуллубаттык иҥэн хаалбыт –  күндү дьоммут мөссүөннэрэ, ааттара..     

Фото страницы

Биһиги нэһилиэктэн, сэрии кэмнэригэр, биэс сыл субуруччу үлэни – хамнаһы кыайар саҥа сүһүөхтэригэр туран үлэлээн – хамсаан эрэр эдэркээн ыччаттарбыт, тапталлаах алаастарыттан арахсан, саа – саадах тутан Ийэ дойдуларын көмүскүү аттаммыттара. 1941 с. күһүнүгэр үс колхозтан 14 киһи бэбиэскэ туппута, 1942 сыл 30 киһи, 1943 сыл 22 киһи, 1944, 1945 сылларга биирдии киһи бэбиэскэ тутан, сэриигэ атаарыллыбыттара.                                       Үс холкуоһунан хаалбыт, кырдьаҕас оҕонньоттор, дьахтар аймах уонна оҕолор сүөһүнү аһы энчирэппэккэ көрөллөрүгэр улахан эппиэтинэс,  ирдэбил турара. Сэрии кыһалҕалаах кэмигэр байыаннай нолуок элбэҕэ, дьону олус кыһарыйара. Сүөһүнү өлөрөн 10 көстөөх сиргэ, көлүүр атынан тиэйэн киллэрэн, харчы оҥостоллоро. Сылгыны өлөрүү сокуонунан көҥүллэммэтэ. Сүөһүнү өлөрөн да сиэбэттэрэ, төбөтө туйаҕа, хара очоҕоһо эрэ хаалара. Кыһалҕаттан тиит үөрэтэ уонна бэс үөрэтэ оҥостон, саас куйуурдаан,күһүн муҥхалаан аһыыллара. Сэрии кэмигэр муҥ саатар сут кураан буолан, бурдук үүммэккэ улахан хоргуйуу буолбута.  

Фото страницы

Нэһилиэк олохтоохторо, аҕа саастаах дьоннорун кэриэстээн, ППМИ программатын, Кыайыы скверин оҥоһуутугар сүүс бырыһыан сүбэлэһэн өйөөбүттэрэ. Сквер үлэтэ, ситэн – хотон, нэһилиэккэ биир кэрэ көстүүлээх миэстэ буолла. Сынньанан олорор ыскамыайкалардаах, бетоннай плиталаах, освещающай лаампалардаах. Кэнэ5эһин  ыччаттар, оҕолор мантан көрүөхтэрэ кыайыыны уһансыбыт эбээлэрин, эһээлэрин. Киэн тутта кэпсээн, ытык дьонноругар сүгүрүйүөхтэрэ!  

        Маҥаастан Изабелла Тимофеева, библиотекарь.

Поделиться
%d такие блоггеры, как: