«Уруукап чаҕыл сааскыта-2” – Үөһээ Бүлүүтээҕи кинигэ киинигэр

Саха наруодунай суруйааччыта Семен Титович Руфов аатын үйэтитэр, олоҕун сырдатар сыаллаах тэриллэр «Уруукап чаҕыл сааскыта” II – с  улуустааҕы тэрээһин муус устар 2 күнүгэр Киин библиотекаҕа буолла.

Суруйааччылар сквердэригэр тэрээһини үөрүүлээхтик арыйыы кэннэ мультимедийнай саалаҕа «Кэл олор сэһэргэһиэх…» ахтыы уонна
“Балык үөстээх, киһи үөннээх” көр-күлүү көҥүл толоруута ыытылынна.

Көр-күлүү түһүлгэтигэр Бүлүү куораттан, Дүллүкү, Үөдүгэй, Харбалаах, Тамалакаан, Нам, Үөһээ Бүлүү нэһилиэктэриттэн 10 айар талааннаахтар бэйэлэрэ айбыт көрдөөх-күлүүлээх айымньыларын ааҕаннар тэрээһин ыалдьыттарын сэҥээриилэрин ыллылар.
Маны сэргэ “Түөрт строка” тута тылбаас күрэҕэ ыытылынна, күрэххэ 13 киһи кытынна. «Түөрт строка»  тиэкиһэ улуу нуучча суруйааччыта Александр Сергеевич Пушкин «Там на брегу, где дремлет лес священный» хоһоонуттан тылбаастаатылар.

Бүлүү куораттан Филиппова Альбина Егоровна – Сыралыма бастаата уонна С.Т. Руфов оҕолоро туруорбут бириистэрин сүүйдэ. Киин библиотека үлэһитэ Саввинова Тамара Герасимовна уонна Тамалакаан орто оскуолатын саха тылын учуутала Спиридонова Татьяна Николаевна биһирэбил бириис туттулар.

“Түөрт строка” күрэҕи куйаар ситимин көмөтүнэн дьүүллээтилэр Семен Титович Руфов оҕолоро уонна Саха сирин суруналыыстарын сойууһун чилиэнэ Афанасий Гуринов – Арчылан.
Күрэх түмүгүн видео конференциянан биллэрдэ Сэмэн Уруукап улахан уола Валерий Семенович.

Тэрээһиҥҥэ мааны ыалдьыт буоллулар Семен Титович уола Максим Семенович Руфов, Үөһээ Бүлүү улууһун баһылыгын солбуйааччыта Михалев Анатолий Семенович, Тамалакаан нэһилиэгин аҕа баһылыга Иванов Петр Прокопьевич.