Yakutians.com

Новости Якутии

“Саҥа сүүрээн”: Улуус сирэ уонна баһылык эдьиийэ. Саҕалааһын баар!

Суруллубут суоруллубат – СУР.

Үөһээ Бүлүү саҥа баһылыга Валерий Николаев “саҥа сиппиир” быһыытынан, “саҥалыы сиппийэн” эрэрин туһунан этэллэр. Ону, бадаҕа, албыннаһааччылара буолуо, “пиардаабыттар”: “Валерий Николаев – первый в республике глава МР, который сообщает о кадровых решениях в телеге. Открыто и не таясь.”

Өрөспүүбүлүкэҕэ, баҕар, бастакы буолуо, баҕар, бастакы буолбатаҕа буолуо, чуолкайын билбэппин эрээри, уларыталыам диэн аһаҕастык эппитэ ыраатта. Онон киһи соһуйуоҕа суох. Оттон “не таясь” диэн хайҕабыл, таах, “чалыр тыл” диэххэ сөп: “таясь” буол, “не таясь буол”, аныгы үйэҕэ барыта тута биллэр, көрүөх бэтэрээ өттүгэр социальнай ситимнэр нөҥүө тарҕанар буоллаҕа. Онон телеграм-ханаалыгар кыһалҕаттан тарҕатар буолуон эмиэ сөп.

Салгыы тутааччылары, тутууга бэдэрээччиктэри уларыталыахтаах. Ол туһунан бырагыраамматыгар чопчу суруйан турар: “Хотугу дойдуга таас тутуу уратыларын сатыыр, ГОСТ уонна СНИП ирдэбиллэрин тутуһар бэдэрээччиктэри аҕалтыам,” – диэн этэ.

Онон Үөһээ Бүлүүгэ үлэтэ суох хаалар туруктаах киһи аҕыйаҕа суох буолан тахсар. Үөһээ Бүлүү уолаттара таас тутууга сысталларыгар уонунан сылларга барбыт үлэ, этэргэ дылы, “ыт ууга сиэлбитин” кэриэтэ буоларыгар тиийэр. Били, национальнай бырайыактар нөҥүө Үөһээ Бүлүү улууһугар тиксэр Арассыыйа бүддьүөтүн харчыта Үөһээ Бүлүү улууһугар хамнас буолан хаалыан, улуус уйгутугар үлэлиэн оннугар Армения, Таджикистан диэки көһөрүллэн иһиэ турдаҕа.

Чэ, буоллун, норуот “ону баҕас уйунуллуо” диэн сөбүлэһэн куоластаатаҕа.

Дьэ, “төбөлөрү кэчигирэтии” саҕаламмыт. Тыа хаһаайыстыбатын управлениетын салайааччыта Сергей Иванов, “Дьаһалта дьиэлэрин уонна тутууларын хааччыйыы” муниципальнай тэрилтэ салайааччыта Николай Александров, промышленность, тутуу уонна инфраструктура сайдыытын управлениетын салайааччыта Николай Дмитриев, муниципальнай баайы-дуолу салайыыга кэмитиэт салайааччыта Артем Филиппов…

Бу дьону ууратыы Үлэ кодексын чэрчитинэн барар ини диэн эрэнэрбитигэр эрэ тиийэбит. Ол эмиэ улуус бүддьүөтүгэр кырата суох ороскуот эбээт. Улуус баайыгар ороскуот.

Баайга сыһыаннаан дьээбэ быһыы-майгы үгүстүк тахсааччы.

Холобур, маннык баар.

Кыра дьыала: баара-суоҕа улуус бас билэр сирэ…

Сир этыы-эргиэн эгэлгэтэ буолуоҕуттан ыла, ымсыы, иҥсэ-мэнэгэй дьон сири апчарынар туһугар тугу да кэрэйбэттэрин туһунан истэ-билэ сылдьабыт.

2020 с. ахсынньы ыйыгар Софронова Валентина диэн Кэнтик олохтооҕо уһаайба сирин арендаҕа ылбыт.

Сокуон ирдэбилинэн, киһи арендаҕа ылбыт сирин бас билиигэ көһөрүөн баҕарар буоллаҕына, онно хапытаалынай эбийиэк туттуохтаах. Акылаакка турар дьиэ, баанньык, гараж уонна да атын тутууну. Онтугар техническэй былаан оҥорторон докумуоннатан, регистрациялыыр палата нөҥүө бэйэтин аатыгар суруйтарыахтаах. Ол докумуонун муниципальнай баайы-дуолу сүрүннүүр кэмитиэккэ (КУМИ) аҕалар, оттон кэмитиэт ону бэрэбиэркэлээн баран, сири бас билиигэ биэрэр.

Валентина Софронова 2023 сыл ахсынньы ыйыгар КУМИга сайыбылыанньа киллэрэр – гараж тутуннум, докумуона бу баар, сири мин бас билиибэр аҕалыҥ диэн.

Кэнтик Үөһээ Бүлүү сэлиэнньэтиттэн субу сытар буоллаҕа, онон кэмитиэт үлэһиттэрэ кэлэ-бара эппиэтинэстээх сирдэригэр харахтарын быраҕа сылдьаллар. Ол диэки гараж тутулла охсубутун атыҥырыы истэннэр, көрөн итэҕэйэргэ быһаарыналлар.

Тиийбиттэрэ – гараж мэлиһээй! Уһаайба сыа хаарынан көрөн турар. Биллэн турар, үлэһиттэр барытын хаартыскаҕа түһэрэллэр. Онно чыыһылата, бириэмэтэ, геолокацията кэлим “тиһиллэр”.

Учаастак сыа хаарынан көрөн турар

Дуоһунастаах сирэй маннык түбэлтэҕэ быраабы араҥаччылыыр уорганнарга сайыбылыанньа хайаан да суруйуохтаах. Суруйбатаҕына сиринэн махинацияҕа кыттыгастаах курдук көрүллэн, эбэтэр холуобунай буруйу көрөн туран биллэрбэтэҕин иһин дьыалаҕа хабыллыан сөп.

Кырата “превышение должностных полномочий” диэн баайсыахтарын сөп.

Саҥа дьыл иннинээҕи сүпсүлгэҥҥэ полиция үлэһиттэрэ соло булан Кэнтиккэ тахсыбакка хаалаллар.

Бырааһынньык кэнниттэн тахсыбыттара, ол уһаайбаҕа ханнык эрэ гараһы состорон аҕалан туруорбуттар. Дьыала “хаахтыйбытын” билэннэр, тутуу былдьаһыыта бардаҕа!

Состорон аҕалбыт гаражтарын холлоҕоһо

КУМИга киирбит докумуонун быһыытынан, гараж 2023 сылга тутуллан бүппүт диэн сурулла сылдьар. Оттон соһуллан кэлбит гараж, быһа холоон, 80 бырыһыан тутуллубут курдук. Өссө иэнин кээмэйдиэххэ баара.

***

Таарыйа эттэххэ, суох гаражка сымыйа техническэй былааны оҥорбут кадастровай инженер “дуоһунаһын туһанан буруйу оҥоруу” иһин тардыллыахтаах.

Кэлин биллибитинэн, кадастровай инженер эмиэ албыннаппыт диэххэ. Киниэхэ маннык гараж тутулунна диэн дьоһуннаах көрүҥнээх гараж хаартыскатын ыыппыттар үһү. Докумуону итинник, ол эбэтэр букатын атын сиртэн оҥорор төһө сөптөөҕүн быраабы араҥаччылааччылар быһаарыахтаахтар.

Кадастровай инженергэ маннык гараж тутуннубут диэн ыыппыт хаартыскалара…

Уһаайба сиринэн махинациялааһын курдук омсолоох быһыы Үөһээ Бүлүүгэ тахса илигэ. КУМИ үлэһиттэрэ, саарбахтыыр түгэннэригэр, бэрэбиэркэлиир этилэр да, баччааҥҥа диэри итинник албыннааһыҥҥа түбэһэ иликтэрэ. Бу бастакы түбэлтэ.

Сахалыы-махалыы эттэххэ, бу муниципальнай сири уорууга холонуу буолар. Холобур, олохтоох дьаһалтаттан сири “түүлэһэн” баран, кэлтэгэй кэппиэйкэни ороскуотурбакка бас билиигэ ылаҥҥын ботуччу сыанаҕа атыылыырыҥ дэлэ үчүгэй буолуо дуо?

КУМИ сайыбылыанньата быраабы араҥаччылааччыларга тиийэн, этэргэ дылы, сүтэн хаалбыт. Сокуон ирдэбилинэн “сылгылаһыы” барар даҕаны, иннэ-кэннэ биллэ илик – бытаан.Тоҕо буолуой?

Үлэтиттэн үүрүллүбүт КУМИ салайааччыта Артем Филиппов кэлин билбитэ, бу Валентина Софронова улуус баһылыга Валерий Николаев эдьиийэ эбит. Бадаҕа, ийэтин бииргэ төрөөбүт балта.

Онон, һэ-һэ, үлэтиттэн үүрүллүбүтэ сөптөөх курдук. Көр да маны, баһылык эдьиийин албыннааһыҥҥа күтүрээбит буола-буола! Улуус баһылыгын аймаҕын полицияҕа үҥсүбүт буола-буола!

Оччотугар, нууччалыы эттэххэ, “личная неприязнь” диэн өйдөнөр баҕайы биричиинэ тахсан кэлэр.

Иккис өттүнэн көрдөххө, улуус баайын, ким да буоллун, сокуон хараҕынан туруулаһар үлэһити өрө тутуохтарын сөп этэ.

Ол аата, “хабарҕаҕа турбут балык уҥуоҕун” кэриэтэ, улуус баайын уҥа-хаҥас тутарбытыгар мэһэй-таһай буолуо диэн дьаахханар буоллахтара.

Оттон баһылык эдьиийин дьыалата бастаан быыбар түмүгэ биллэрин кэтэһиигэ майгынныыра. Оттон билигин “болдьоҕо ааһарын” кэтэһиигэ майгынныырга дылы…

Сураҕа, “кыра дьыала” дииллэр үһү.

Суруллубут суоруллубат – СУР.

Поделиться
%d такие блоггеры, как: