ИЛ ДАРХАН САРДААНА ТРОФИМОВАҔА БОЧУОТТААХ БЭЛИЭНИ ТУТТАРДА

Бүгүн, алтынньы 1 күнүгэр, Ил Дархан Айсен Николаев норуоттар икки ардыларынааҕы кылаастаах спорт маастара, Москватааҕы марафон кыайыылааҕа Сардаана Трофимованы уонна кини уһуйааччыта, Россия үтүөлээх тренерэ Татьяна Жиркованы кытта көрүстэ. Саха Республикатын Ил Дарханын уонна Правительствотын Пресс-сулууспата иһитиннэрэринэн, Айсен Сергеевич спортсменканы уонна кини тренерин Москватааҕы марафоҥҥа үһүс төгүлүн чулуу бириэмэлээх кыайыыларынан эҕэрдэлээтэ.

– Биһиги бары марафону кэтээн көрбүппүт, эһиэхэ ыалдьыбыппыт. Эһиги өссө төгүл бэйэҕит кыаххытын көрдөрдүгүт, – диэн туран, кырдьыктаах дьыала кыайарыгар, Сардаана Трофимова Токиотааҕы Олимпиадаҕа кыттарыгар баҕарда.

Салгыы Ил Дархан, республика инникитин даҕаны Сардаана күрэхтэһиилэргэ кыттыытыгар уонна бэлэмнэниитигэр күүс-көмө, өйөбүл буола турарыгар эрэннэрдэ.

Итиэннэ физическэй култуура уонна спорт эйгэтигэр үтүөлэрин, олимпийскай хамсааһын идеяларын тарҕатарын уонна спорка үрдүк көрдөрүүлэрин иһин, Айсен Николаев Сардаана Трофимоваҕа “Саха Республикатын физическэй култуураҕа уонна спорка үтүөлээх үлэһитэ” бочуоттаах ааты иҥэрдэ.

Ити курдук, тренер Татьяна Юрьевна Жиркова Саха Республикатын Правительствотын грамотатынан наҕараадаланна.

Сардаана Ил Дархан болҕомтотугар махтанан баран, салгыы хайдах быһыылаахтык дьарыктанарын билиһиннэрдэ. Ол курдук, сотору кэминэн Кыргызстаҥҥа тиийэн үөрэтэр-эрчийэр түмсүүгэ анал бэлэмнэниини барыахтааҕын эттэ. Ахсынньыга Сочига буолар Россия чемпионатыгар өссө төгүл дойдуга бастыҥ марафонец буоларын бигэргэтиэхтээх.

Биллэрин курдук, Сардаана Трофимова Москватааҕы марафоҥҥа олимпийскай нуорманы толорбута. Ол эрээри ону аны чэпчэки атлетика аан дойдутааҕы Федерацията бигэргэтиэхтээх.

Биһиги бары бастыҥ сүүрүүк кыыспыт баҕа санаата туоларыгар баҕарабыт! “Дьулурҕан”. Андрей Сорокин хаартыскаҕа түһэриитэ.

Источник: ulus.media