“Хоросо!” Хоролор көрдөрөллөр, дьону күллэрэллэр

Үөһээ Бүлүү Хоро нэһилиэгэр Кулун тутар 27 күнүгэр, Россияҕа театр күнүн көрсө, бииртэн биир кэрэ сонуннар кэккэлэстилэр.

⠀⠀А.Д.Филиппов аатынан култуура тэрилтэтин иһинэн үлэлиир көр-нар аргыстаах, дьээбэ-хообо бэтиэхэлээх театральнай коллективпыт  Иван Гоголев суруйуутугар, Иван Касьянов туруоруутугар НААРА СУОХ – 3 оонньуулаах, 5 хартыыналаах комедия испэктээҕи сүрэхтээтилэр.
⠀⠀Испэктээх бэрт сэргэхтик  ааста, көрөөччүлэр биһирэбиллэрин, махталларын ылла. Бу испэктээҕи 30 сыл анараа өттүгэр Александра Даниловна Евдокимова Улан-Удэтээҕи культура институтун бүтэрэригэр дипломнай үлэтинэн туруорбута, ол кэмтэн 30 сыл буолан баран туруорулунна.
⠀⠀Театрбыт биир талааннаах артыыһыгар, түөрт уонча сыл көрөөччү кутун тутан артыыстаабыт сцена ветераныгар Спиридон Бестиновка “За вклад в развитие народного творчества РС(Я)” Саха республикатын Культураҕа уонна духуобунаска Министерствотын бэлиэтин  туттардылар.
⠀⠀Республиканскай “Туос мааскы-2021” театральнай коллективтары көрүү куонкуруска биһиги театральнай коллективпыт  Е.Афанасьев-Кэпсэтээрэп суруйбут “Сэрии тулаайаҕа”-драма спектаклынан кыттан,  3 ст.лауреат, “Бастыҥ актерскай састаап” анал ааты ылла.
⠀
Тамара Семёнова

Сигэ: mr-verhneviljujskij.sakha.gov.ru