Балыктааһын хаамыыта: Булуҥ улууһугар көмүс хатырыктааҕы соҕотуопкалааһын былаанынан бара турар

Балык хаһаайыстыбаларыгар сайыҥҥы үлэ түмүктэнэн, балыксыттар кыһыҥҥы балыктааһыҥҥа бэлэмнэнэн эрдэхтэрэ. Булуҥ улууһун тыа хаһаайыстыбатын салайааччыта Николай Захаров иһитиннэрбитинэн, быйыл улууска түөлбэнэн үлэлиир балык хаһаайыстыбалара сайыҥҥы балыктааһын кэмигэр 413,591 туонна көмүс хатырыктааҕы соҕотуопкалаатылар. Бу туһунан «Маяк Арктики» хаһыат сырдатар. 

Сыл устата Булуҥ улууһугар бэриллэр квота 1688,880 кэриҥэ туонна балык бултанар. Маныаха айылҕа уустук усулуобуйата сүрүн оруолу оонньуур.

2023 сылга, эмиэ урукку сылларга курдук, аҕа ууһун общиналара, муниципальнай тэрилтэлэр балыктааһыҥҥа былааны толорууга көхтөөхтүк кыттыбыттара бэлиэтэнэр. Ол курдук, бу дьыл от ыйынааҕы түмүгүнэн «Арктика» артыал — 18 т 049 киилэ, «Таймылыыр» МУТ — 19 т 759 к, «Булуҥ» МУТ — 217 т 568 к, «Приморскай» МУТ — 11 т 392 к, «Чокуурап» кооператив — 52 т 050 к, «Байанай» кооператив — 5 т 890 к, «Тиит-Арыы» — 10 т 509 к, «Алгыс» кооператив — 13 т 609 к, «Тиксии» община – 10 т 3 к, «Күһүүр факторий» — 21 т 993 к, «Миронов А.Е.» — 16 т 182 к, «Ачикасов Е.И.» – 327 к, «Стручкова Т.И. – 8 т 800 к, «Байкал» — 7 т, «Растутаев П.П.» — 460 киилэ соҕотуопкалаан, уопсайа 413 туонна 591 киилэ көмүс хатырыктааҕы туттардылар. Онон соҕотуопкаламмыт сайыҥҥы балык 24,489 % толорулунна.

Я. Иванова, хаартыска Федор Сердцев тиксэриитэ