2020 сыл бастыҥ спортсменнара – кыргыттар!

Өр кэтэспит күүтүүлээх күммүт үүннэ. Уон күн устата «Спорт Якутии» сайтка барбыт ааһан эрэр сыл бастыҥ спортсменнарыгар куоластааһын түмүктэннэ. Тэрийээччилэр этэллэринэн, номинацияларга бастыҥнары талыыга 25 тыһыынча куолас киирбит. Куоластааһын түмүгэ “Саха” национальнай көрдөрөр-иһитиннэрэр хампаанньа телевизорынан быһа биэриитигэр көрдөрүлүннэ. Спорт олимпийскай көрүҥнэригэр боксер Василий Егоров, марафонец Сардаана Трофимова, тустуук Айаал Лазарев бүтэһик түһүмэххэ киллэриллэн, хайалара ааһан эрэр сыл чулуу спортсмена буоларын быһаарыстылар. Онуоха элбэх куолаһы ылан, Саха Республикатын 2020 сыллааҕы Бастыҥ спортсменынан норуоттар икки ардыларынааҕы кылаастаах спорт маастара, Россия чемпиона Сардаана Трофимова буолла. Оттон Олимпиадаҕа киллэриллибэтэх көрүҥнэргэ дуобатчыттар Андрей Федотов, Матрена Ноговицына, кикбоксер Вадим Колтовской икки ардыларыгар куоластааһын ыытылынна. Түмүккэ кыайыылааҕынан элбэх куолаһы хомуйан международнай гроссмейстер Матрена Ноговицына буолла. Спорт адаптивнай көрүҥнэригэр билэргит курдук куоластааһыҥҥа охчут Степанида Артахинова, харбааччы Анастасия Диодорова, пауэрлифтер Владимир Балынец киллэриллибиттэрэ. Манна 2020 сыл бастыҥ спортсменынан спорт үтүөлээх маастара Анастасия Диодорова буолла. Спорт национальнай көрүҥнэригэр мас-рестлер Екатерина Белолюбская, многоборец Леонид Филиппов, хотугу многоборец Алексей Созонов күрэс былдьастылар. Маныаха куоластааһын түмүгүнэн бастыҥынан Россия чемпиона Екатерина Белолюбская (45,78 %) ааттанна. Саха Республикатын спорка лауреаттарын уонна кинилэр тренердэрин барыларын эҕэрдэлиибит! Төрөөбүт дойдуларын былааҕын өрүү күөрэччи тута, ситиһии аргыстаах сылдьалларыгар баҕарабыт!

Петр ПАВЛОВ

Источник: https://mr-verhneviljujskij.sakha.gov.ru/